گردوں کی غیر قانونی پیوندکاری میں ملوث گروہ گرفتار

ملزمان نے افریقی شہری سے پیوندکاری کی مد میں 70 لاکھ روپے وصول کئے ،ڈونرکو رقم ادا نہیں کی گئی

منگل 29 جولائی 2025 22:50

گردوں کی غیر قانونی پیوندکاری میں ملوث گروہ گرفتار

لاہور(اُردو پوائنٹ اخبارتازہ ترین - این این آئی۔ 29 جولائی2025ء)پنجاب ہیومن آرگن ٹرانسپلانٹیشن اتھارٹی سمیت دیگر اداروں نے مشترکہ کارروائی کے دوران غیر قانونی پیوندکاری میں ملوث 8 رکنی گروہ کو گرفتار کر لیا ۔پنجاب ہیومن آرگن ٹرانسپلانٹیشن اتھارٹی نے شیخوہ پوری کی نجی ہسپتال میں چھاپہ مارا جہاں غیرقانونی پیوندکاری میں ملوث منظم گروہ مقامی رہائشی کا گردہ نکال کر افریقی شہری کو لگا رہا تھا۔

(جاری ہے)

پی ہوٹا کے مطابق ملزمان نے افریقی شہری سے پیوندکاری کی مد میں 70 لاکھ روپے وصول کر لیے تھے تاہم گردہ دینے والے ڈونرکو رقم ادا نہیں کی گئی۔اتھارٹی نے بتایا کہ کارروائی کے دوران ڈاکٹر وقاص مصطفی سمیت 2 خواتین، آپریشن تھیٹر ٹیکنیشنز اور ایجنٹس کو گرفتار کیا گیا ہے۔مزید بتایا گیا ہے کہ گروہ انسانی اعضاکی خرید و فروخت اور غیر قانونی ٹرانسپلانٹیشن میں ملوث تھا، جبکہ ملزم جعلی ڈاکٹر نسیم کی گرفتاری کے لیے چھاپے مارے جا رہے ہیں۔حکام کا اس حوالے سے کہنا ہے کہ تحقیقات کا دائرہ وسیع کر دیا گیا ہے اور شیخوپورہ سمیت دیگر شہروں میں ملوث سہولت کاروں کے خلاف چھاپے جاری ہیں تاکہ اس غیر قانونی نیٹ ورک کا مکمل خاتمہ کیا جا سکے۔