کراچی انٹر بورڈ میں 11ویں جماعت کے طلبا کی اکثریت فیل ہونے کا معاملہ، 97 فیصد کے نتائج درست قرار

ہفتہ 19 جولائی 2025 17:47

کراچی (اُردو پوائنٹ اخبارتازہ ترین - این این آئی۔ 19 جولائی2025ء)کراچی انٹر بورڈ کے 11ویں جماعت کے طلبا کی اکثریت فیل ہونے کے معاملے پر 26 ہزار طلبا نے پرچوں کی اسکروٹنی کروائی، جن میں سے 97 فیصد کے نتائج درست قرار پائے گئے۔

(جاری ہے)

دستاویزات کے مطابق سائنس گروپ کے 6 ہزار 174 امیدواروں کے پرچوں کی اسکروٹنی کی گئی جبکہ میڈیکل گروپ کے 10ہزار 302 امیدواروں کے پرچوں کی اسکروٹنی کی گئی۔انجینئرنگ گروپ کے 9 ہزار سے زائد امیدواروں کی اسکروٹنی کی گئی، اسکروٹنی کرانے والے طلبا کو ماہر اساتذہ و والدین کی موجودگی میں کاپیاں بھی چیک کرائی گئیں۔دستاویز کے مطابق 26 ہزارامیدواروں میں سے 830 کے نتائج میں معمولی تبدیلی آئی، اسکروٹنی کی رپورٹ سندھ اسمبلی کی پارلیمانی کمیٹی کو بھیجی جائے گی۔