ؔوسطی بلوچستان کے آٹھ اضلاع کے وکلا نے مل کر ہائی کورٹ سرکٹ بینچ خضدار کے نام سے ایک نئی تنظیم تشکیل دی

ژ*خضدار (اُردو پوائنٹ اخبارتازہ ترین - آن لائن۔ 19 جولائی2025ء) وسطی بلوچستان کے آٹھ اضلاع کے وکلا نے مل کر ہائی کورٹ سرکٹ بینچ خضدار کے نام سے ایک نئی تنظیم تشکیل دی ہے۔ اس تنظیم کی عبوری کابینہ کا اعلان بھی کر دیا گیا ہے، جس میں ایڈووکیٹ بشیر احمد سمالانی کو صدر اور شاہزیب بلوچ کو جنرل سیکریٹری منتخب کیا گیا ہے۔ ہفتے کے روز خضدار میں منعقد ہونے والے ایک اہم اجلاس میں وسطی بلوچستان کے مختلف اضلاع سے تعلق رکھنے والے وکلا نے باہمی مشاورت کے بعد خضدار سرکٹ بینچ ہائی کورٹ بار ایسوسی ایشن کی بنیاد رکھی۔

اجلاس میں عبوری کابینہ کے اراکین کا انتخاب بھی عمل میں آیا۔ منتخب ہونے والے عہدیداران میں صدر بشیر احمد سمالانی خضدار ، نائب صدر حاجی نظر بلوچ خاران جونیئر نائب صدر عبدالسلام عمرانی قلات جنرل سیکریٹری شاہزیب بلوچ حب جوائنٹ سیکریٹری محمد نعیم مینگل خضدار جونیئر جوائنٹ سیکریٹری آسیہ سلام خضدار پریس سیکریٹری قاضی عبدالغفور آواران فنانس سیکریٹری قادر بخش جمالی اوتھل اور لائبریرین سیکریٹری نوید بلوچ سوراب شامل ہیں۔

(جاری ہے)

اجلاس سے قبل خضدار بار روم میں ایک ابتدائی اجلاس منعقد کیا گیا، جس کا مقصد ہائی کورٹ سرکٹ بینچ خضدار کی تشکیل اور اس کی عبوری کابینہ کے انتخاب سے متعلق مشاورت تھا۔ اجلاس میں ضلع خضدار، حب، سوراب، اور قلات کے وکلا کے نمائندوں نے ذاتی طور پر شرکت کی، جبکہ لسبیلہ بار اور آواران بار کے نمائندوں نے حب بار کے جنرل سیکریٹری محمد اسلم مینگل کو مکمل اختیار تفویض کیا۔

مجموعی طور پر چھ اضلاع کے وکلا نے اس مشاورت میں حصہ لیا، جبکہ خاران بار اور واشک بار کے نمائندے شرکت نہ کرسکے ۔اجلاس اپنے ایجنڈے کے مطابق کامیابی سے مکمل ہوا۔ اجلاس کی کارروائی خضدار بار کے جنرل سیکریٹری غلام نبی ایڈووکیٹ نے سرانجام دی۔اجلاس میں شریک سینئر وکلا، جن میں خضدار بار کے سینئر ممبر خالد محمود مینگل، صدر فیاض محمد شہی، جنرل سیکریٹری غلام نبی مینگل، حب بار کے سینئر ممبر شاہزیب بلوچ، جنرل سیکریٹری محمد اسلم مینگل، قلات بار کے صدر عبدالسلام عمرانی، اور سوراب بار کے صدر منیر آزاد اور جنرل سیکریٹری قدیر بلوچ شامل تھے، نے خطاب کیا۔

انہوں نے ہائی کورٹ سرکٹ بینچ خضدار کی تشکیل کو خطے کے وکلا کے لیے ایک اہم سنگ میل قرار دیا اور اسے عدالتی نظام کی بہتری کے لیے ایک مثبت اقدام بتایا۔اجلاس کے بعد بلدیہ ریسٹ ہاس خضدار میں میڈیا کو بریفنگ دی گئی، جس میں خضدار سرکٹ بینچ ہائی کورٹ بار ایسوسی ایشن کے قیام اور اس کے مقاصد سے صحافیوں کو آگاہ کیا گیا۔ اس موقع پر خضدار بار ایسوسی ایشن کی جانب سے وکلا اور صحافیوں کے اعزاز میں ایک پرتکلف ظہرانے کا اہتمام بھی کیا گیا۔

یہ نئی تنظیم وسطی بلوچستان کے وکلا کے حقوق کے تحفظ، عدالتی نظام کی بہتری، اور علاقائی سطح پر قانونی خدمات کو بہتر بنانے کے لیے کام کرے گی۔ وکلا نے امید ظاہر کی کہ یہ تنظیم اضلاع میں قانون کی بالادستی اور وکلا برادری کے مسائل کے حل میں اہم کردار ادا کرے گی اس موقع پر خضدار بار کے سنیئر وکلا عبدالسلام ایڈوکیٹ غلام قادر ایڈوکیٹ سکندر ایڈوکیٹ عبدالوہاب ساسولی ایڈوکیٹ میر منیر احمد ساسولی ایڈوکیٹ سمیت وکلا نے کثیر تعداد میں شرکت کی