کراچی،لوٹ مار کی واردات ناکام، شہری کی فائرنگ سے ڈاکو ہلاک

ایک ساتھی موٹر سائیکل پر سوار ہو کر فرار ہو گیا اور تیسرا دوڑتا ہوا موقع سے بھاگ نکلا

ہفتہ 19 جولائی 2025 21:50

کراچی(اُردو پوائنٹ اخبارتازہ ترین - این این آئی۔ 19 جولائی2025ء)کراچی کے علاقے عزیز آباد میں ڈکیتی کی واردات کے دوران ایک بہادر شہری کی جوابی کارروائی نے صورتحال بدل دی۔ ہوٹل پر بیٹھے پانچ دوستوں سے لوٹ مار کی کوشش ناکام بنا دی گئی، جبکہ ایک ڈاکو موقع پر ہی ہلاک ہو گیا، جس کی سی سی ٹی وی فوٹیج بھی منظرعام پر آگئی ہے ۔سی سی ٹی وی فوٹیج میں دیکھا جا سکتا ہے کہ ہوٹل پر پانچ نوجوان بیٹھے موبائل فون استعمال کر رہے تھے کہ اچانک ایک موٹر سائیکل پر سوار تین مسلح ملزمان وہاں پہنچے۔

(جاری ہے)

ڈاکوں نے اسلحہ دکھا کر شہریوں سے موبائل فون چھیننا شروع کیے۔اسی دوران ایک نوجوان نے موقع کا فائدہ اٹھاتے ہوئے اپنا اسلحہ نکالا اور ڈاکوں پر فائرنگ کر دی۔ شہری کی فائرنگ سے ایک ڈاکو موقع پر ہی ہلاک ہو گیا، جبکہ اس کا ایک ساتھی موٹر سائیکل پر سوار ہو کر فرار ہو گیا اور تیسرا دوڑتا ہوا موقع سے بھاگ نکلا۔پولیس کے مطابق یہ واقعہ گزشتہ شب عزیز آباد تھانے کی حدود میں پیش آیا۔ علاقے میں حالیہ دنوں میں ڈکیتی اور اسٹریٹ کرائم کی وارداتوں میں اضافہ دیکھا گیا ہے، جس پر شہریوں میں شدید تحفظات پائے جاتے ہیں۔ پولیس نے فرار ہونے والے ملزمان کی تلاش شروع کر دی ہے اور ہلاک ڈاکو کی شناخت کا عمل جاری ہے۔