محکمہ ماہی پروری کی فش فارمنگ کیلئے بلامعاوضہ مشاورتی و تکنیکی سہولیات کی فراہمی جاری

پیر 21 جولائی 2025 16:57

فیصل آباد (اُردو پوائنٹ اخبارتازہ ترین - اے پی پی۔ 21 جولائی2025ء) محکمہ ماہی پروری نے کہا ہے کہ فش فارم بنا کر بنجر زمینوں کو کارآمد بنایا جا سکتا ہے جبکہ درخت لگانے سے بھی بنجر زمینوں میں ذرخیزی لائی جا سکتی ہے۔ محکمہ فشریز فیصل آباد کے ترجمان نے کہاکہ محکمہ ماہی پروری کی جانب سے فش فارمنگ کے فروغ کیلئے بلا معاوضہ مشاورتی و تکنیکی سہولیات کی فراہمی کا سلسلہ جاری ہے۔

انہوں نے کہاکہ مذکورہ اقدام کیلئے محکمہ ماہی پروری کے ماہرین اورآبی و زرعی سائنسدان اپنے تمام وسائل بروئے کار لا رہے ہیں۔

(جاری ہے)

انہوں نے بتایاکہ فش فارمنگ سے نہ صرف انسانی خوراک میں لحمیات کی کمی کو پورا کیا جا سکتاہے بلکہ اس سے کاشتکاروں کی آمدنی میں بھی خاطر خواہ اضافہ ممکن ہے۔ انہوں نے بتایاکہ کاشتکاروں کو فش فارمنگ کے جدید طریقوں سے روشناس کروانے کیلئے محکمہ ماہی پروری اور بعض دیگر اداروں کے اشتراک سے ڈویژن، ضلع، تحصیل اور یونین کونسل کی سطح پر تربیتی سیمینارز کا انعقاد کرنے کیلئے حکمت عملی مرتب کی جا رہی ہے جس کے انتہائی مفید اثرات مرتب ہوں گے۔ انہوں نے بتایاکہ ناکارہ اور بنجر زمینوں میں درخت لگانے سے بھی ذرخیزی آ جاتی ہے۔