وزیراعلیٰ سندھ سے بلوچستان کے وزیر برائے لائیواسٹاک کی ملاقات ، اعلیٰ نسل کے مویشیوں کے تبادلے کا فیصلہ

پیر 21 جولائی 2025 23:05

کراچی (اُردو پوائنٹ اخبارتازہ ترین - اے پی پی۔ 21 جولائی2025ء) وزیراعلی سندھ سید مراد علی شاہ سے بلوچستان کے وزیر برائے لائیوسٹاک سردارزادہ میر فیصل جمالی نے ملاقات کی اور اعلیٰ نسل کے مویشیوں کے تبادلے اور دونوں صوبوں کے درمیان لائیوسٹاک کے شعبے میں تعاون بڑھانے کا فیصلہ کیا۔پیر کو جاری اعلامیہ کے مطابق یہ ملاقات وزیراعلیٰ ہائوس میں ہوئی جس میں سندھ کے وزیر برائے فشریز و لائیواسٹاک محمد علی ملکانی بھی موجودتھے۔

(جاری ہے)

دونوں رہنمائوں کے درمیان جیکب آباد میں ایک مویشی میلہ منعقد کرنے پر اتفاق ہوا جہاں وزیراعلیٰ سندھ مراد علی شاہ نے ذاتی طور پر شرکت کا عزم ظاہر کیا اور وزیراعلی بلوچستان کو دعوت دینے کا اعلان کیا۔ انہوں نے دونوں صوبوں کے لائیواسٹاک محکموں کے درمیان مشترکہ تحقیق کی اہمیت پر زور دیا۔اس موقع پر سندھ کی تھری نسل کی گائے، ریڈ سندھی، کنڈی بھینس، کوہستانی اونٹ اور بکریوں جبکہ بلوچستان کی مشہور نسلوں جیسے رکھلی گائے، بھگانی بیل اور کوچی اونٹ کو دونوں صوبوں کے مویشی پال حضرات اور تاجروں میں متعارف کرانے کا فیصلہ کیا گیاہے۔