خیبر پختونخوا کے سینیٹ الیکشن میں پی ٹی آئی کے 6امیدوار کامیاب ، اپوزیشن کو 5 نشستیں ملیں،غیر حتمی و غیر سرکاری نتیجہ

پیر 21 جولائی 2025 22:30

پشاور (اُردو پوائنٹ اخبارتازہ ترین - اے پی پی۔ 21 جولائی2025ء) خیبر پختونخوا کے سینیٹ الیکشن میں پی ٹی آئی کو6جبکہ اپوزیشن کو 5 نشستیں ملیں۔غیر حتمی و غیر سرکاری نتیجے کے مطابق خیبرپختونخوا اسمبلی میں سینیٹ انتخاب میں پی ٹی آئی نے 6 اور اپوزیشن جماعتوں نے 5 نشستوں پر کامیابی حاصل کرلی۔الیکشن کمیشن آف پاکستان خیبرپختونخوا کے مطابق خیبر پختونخوا میں سینیٹ کی 11نشستوں پرووٹ ڈالے گئے اور اسمبلی کے تمام 145 اراکین نے ووٹ کاسٹ کیا۔

نتائج کے مطابق7جنرل نشستوں میں سے 4نشستوں پر پی ٹی آئی کامیاب قرار پائی، پی ٹی آئی کے مرادسعید، فیصل جاوید، مرزا آفریدی اور نورالحق قادری جنرل نشستوں پرجیتے۔غیرسرکاری نتیجے کے تحت اپوزیشن جماعتیں 3جنرل نشستوں پرکامیاب ہوئیں، ن لیگ کے نیاز احمد، پیپلزپارٹی کے طلحہ محمود اور جےیوآئی کے عطا الحق جنرل نشستوں پر کامیاب قرار پائے ۔

(جاری ہے)

پی ٹی آئی کے امیدوار مراد سعید جنرل نشست پرجیت گئے، انہیں 26 ووٹ ملے، فیصل جاوید کو 22 اور نورالحق قادری کو 2 ووٹ ملے جبکہ مرزا آفریدی کو 21ووٹ ملے۔خواتین کی 2 نشستوں میں سے ایک پر پی ٹی آئی کی روبینہ ناز اور دوسری پر پیپلزپارٹی کی روبینہ خالد کامیاب ہوئیں۔غیر حتمی نتیجے کے مطابق خواتین کی نشست پر پی ٹی آئی کی امیدوار روبینہ ناز کو 89 ووٹ ملے ۔اسی طرح ٹیکنوکریٹس کی نشستوں میں سے ایک پر پی ٹی آئی کے اعظم سواتی اور دوسری پر جے یو آئی کے دلاورخان جیت گئے۔