خواجہ سلمان رفیق کی زیر صدارت اجلاس، ٹیچنگ ہسپتالوں میں آئی سی یوز کی صلاحیت میں اضافہ کے لئے اقدامات کا جائزہ

منگل 22 جولائی 2025 17:04

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) صوبائی وزیر صحت خواجہ سلمان رفیق کی زیر صدارت سروسز انسٹی ٹیوٹ آف میڈیکل سائنسز میں اجلاس منعقد ہوا۔اجلاس کے دوران ٹیچنگ ہسپتالوں میں آئی سی یوز کی صلاحیت میں اضافہ کے لئے اقدامات کا جائزہ لیا گیا۔اجلاس کے شرکا نے اس حوالے سے اپنی قیمتی آرا اور تجاویز پیش کیں۔صوبائی وزیر صحت خواجہ سلمان رفیق نے کہا کہ وزیر اعلی مریم نواز کے ویژن کے مطابق عوام تک صحت کی بہترین سہولیات کی فراہمی اولین ترجیح ہے۔

ہسپتالوں کے موجودہ نظام میں بہتری لانے کے ساتھ ساتھ حکومت نئے ہسپتال بھی بنا رہی ہے۔ہسپتالوں میں انفیکشن کنٹرول ڈیپارٹمنٹس کو بھی فعال بنایا جا رہا ہے۔ہسپتالوں میں ہائپو تھرمیا یونٹس بھی بنائے جائیں گے۔

(جاری ہے)

خواجہ سلمان رفیق نے کہاکہ ہسپتالوں میں محفوظ علاج ہر مریض کا بنیادی حق ہے۔مریضوں کے علاج میں کسی قسم کی کسر اٹھا نہیں رکھی جا رہی۔اجلاس میں چیئرمین وزیر اعلی پنجاب ایڈوائزری کمیٹی برائے امراض قلب ڈاکٹر فرقد عالمگیر،ایڈیشنل سیکرٹری ٹیکنیکل محکمہ سپیشلائزڈ ہیلتھ کیئر اینڈ میڈیکل ایجوکیشن ڈاکٹر محمد وسیم،پرنسپل سمز پروفیسر زوہرہ خانم،ایم ایس سروسز ہسپتال ڈاکٹر عابد محمود غوری،پروفیسر شعیب نبی، پروفیسر مظہر اور ڈاکٹر لیاقت نے شرکت کی۔