کیریئر کے آغاز پر ایک سینماء مالک نے بدتمیزی کی ، کامیابی پر ادب احترام سے پیش آیا،ہارون شاہد

منگل 22 جولائی 2025 22:52

کراچی (اُردو پوائنٹ اخبارتازہ ترین - این این آئی۔ 22 جولائی2025ء)معروف اداکار اور موسیقار ہارون شاہد نے کہا ہے کہ کیریئر کے آغاز میں ایک سینماء مالک نے بدتمیزی کی ، کامیابی پر ادب احترام سے پیش آیا۔نجی ٹی وی شو میں گفتگو کرتے ہوئے ہارون شاہد نے بتایا کہ میں ایک کمپنی میں کام کرتے ہوئے ساتھ ہی موسیقی کے شعبے میں بھی اپنی جگہ بنانے کی کوشش کر رہا تھا، ان دنوں میں ایک سنیما مالک سے کسی پروجیکٹ کے سلسلے میں ملاقات ہوئی، مگر مالک نے میرے ساتھ نہایت بدتمیزی سے پیش آتے ہوئے مجھے بے عزت کیا۔

ہارون نے کہا کہ وہ لمحہ میرے لیے باعثِ شرمندگی تھا، لیکن اسی لمحے میں نے دل میں تہیہ کر لیا کہ ایک دن میں اسی شخص کو اپنی کامیابی دکھاؤں گا۔انہوں نے بتایا کہ تقریباً ایک سال بعد قسمت نے مجھے وہ موقع فراہم کیا جب فلمساز شعیب منصور کی فلم ورنہ میں ماہرہ خان کے ساتھ مجھے کاسٹ کیا گیا، فلم کی پروموشن کے سلسلے میں میں دوبارہ اسی سنیما پہنچا، لیکن اس بار ناصرف میں ایک کامیاب اداکار کے طور پر آیا بلکہ میرے پوسٹرز پورے سنیما کی عمارت پر آویزاں تھے۔

(جاری ہے)

اداکار نے بتایا کہ ماہرہ خان میرے ساتھ تھیں اور وہی سنیما مالک جو کبھی مجھ سے بدتمیزی کرتا تھا اب ادب و احترام سے پیش آ رہا تھا۔ہارون شاہد نے کہا کہ یہ لمحہ میرے لیے بہت معنی رکھتا تھا اور میں نے خود کو خوش نصیب سمجھا کہ میں عزت کے ساتھ واپس لوٹا۔