!غیر فعال ایم ایم اے کو فعال کرنے کیلئے مولانا فضل الرحمن کے رہنماؤں سے ٹیلی فونک رابطے،متحدہ مجلس عمل کے رہنماؤں کو اپنی رہائش گاہ پر مدعو کیا

ابھی یہ ابتدائی مشاورت ہے، قبل از وقت کچھ نہیں کہہ سکتے،چار بڑی مذہبی سیاسی شخصیات کا اکٹھ غیر معمولی اہمیت کا حامل ہے،ذرائع ایم ایم اے

منگل 22 جولائی 2025 21:45

%اسلام آباد(اُردو پوائنٹ اخبارتازہ ترین - آن لائن۔ 22 جولائی2025ء)جمعیت علماء اسلام (ف) کے سربراہ مولانا فضل الرحمن نے غیر فعال متحدہ مجلس عمل کے رہنماؤں سے رابطے کئے ہیں اور متحدہ مجلس عمل کو ایک بار پھر فعال کرنے کی کوششیں تیز کر دی ہیں،اس حوالے سے مولانا فضل نے سربراہ اسلامی تحریک علامہ ساجد نقوی سے ٹیلیفونک رابطہکیا۔ذرائع کے مطابق جمعیت اہلحدیث کے سربراہ حافظ عبد الکریم اور مولانا اویس نورانی سے بھی ٹیلیفونک رابطے کئے گئے اور مولانا فضل الرحمان نے متحدہ مجلس عمل کے رہنماؤں کو اپنی رہائش گاہ پر مدعو کیا۔

ذرائع نے مزید بتایا کہ غیر فعال متحدہ مجلس عمل کے رہنماؤں کے آپسی رابطے میں متحدہ مجلس عمل (ایم ایم اے )بحالی سمیت دیگر امور زیر غور آئینگے،اس حوالے سے ذرائع کا کہنا ہے کہ مولانا فضل الرحمان، علامہ ساجد نقوی، حافظ عبد الکریم اور مولانا اویس نورانی کے درمیاں آج اہم ملاقات ہوگی جبکہ تاحال جے یو آئی کی طرف سے جماعت اسلامی کو مدعو نہیں کیا گیاجبکہ جمعیت علمائے پاکستان کے دوسرے ڈھڑے ابوالخیر محمد زبیر بھی تاحال ملاقات میں مدعو نہیں ہیں۔

(جاری ہے)

ذرائع کا مزید کہنا ہے کہ ملاقات میں متحدہ مجلس عمل (ایم ایم اے )کی فعالیت، غیر فعالیت کے اسباب سمیت دیگر امور زیر غور آئیں گے۔اس حوالے سے غیر فعال ایم ایم اے کے ذرائع نے بتایا کہ ابھی یہ ابتدائی مشاورت ہے، قبل از وقت کچھ نہیں کہہ سکتے،چار بڑی مذہبی سیاسی شخصیات کا اکٹھ غیر معمولی اہمیت کا حامل ہے،ملاقات میں ملک کی مجموعی سیاسی صورتحال کیساتھ غزہ اور خطے کی صورتحال بھی زیر غور آئے گی