میئرلندن کا برطانیہ سے فوری طور پر فلسطین کو ریاست تسلیم کرنے کا مطالبہ

غزہ کے مناظر بدتر ہو رہے،بھوک سے نڈھال بچے ملبے کے ڈھیر میں مایوسی کے عالم میں غذا کے متلاشی ہیں، صادق خان

بدھ 23 جولائی 2025 21:10

لندن (اُردو پوائنٹ اخبارتازہ ترین - این این آئی۔ 23 جولائی2025ء)میئر لندن صادق خان نے برطانوی حکومت سے فوری طور پر فلسطین کو ریاست تسلیم کرنے کا مطالبہ کردیا۔سوشل میڈیا پر جاری بیان میں میئر لندن صادق خان نے کہا کہ فلسطین میں کوئی دو ریاستی حل نہیں ہوسکتا جب ہمارے پاس کہنے کو کوئی فلسطینی ریاست ہی باقی نہ رہے۔

(جاری ہے)

انہوںنے کہا کہ غزہ کے خوفناک مناظر دن بہ دن بدتر ہو رہے ہیں، بھوک سے نڈھال بچے ملبے کے ڈھیر میں مایوسی کے عالم میں غذا کے متلاشی ہیں، جب کہ امداد کے منتظر فلسطینی خاندانوں کا اسرائیلی فوج قتل کر رہی ہے۔

انہوں نے کہا کہ برطانوی حکومت اور عالمی برادری کو صورتحال کو روکنے کے لیے اسرائیل پر دبائو بڑھانے کے لیے مزید اقدامات کرنا ہوں گے۔ انہوں نے کہا کہ اسرائیلی اقدامات کا کوئی جواز نہیں ہے، برطانوی حکومت فوری طور پر فلسطین کو ریاست تسلیم کرے۔