ڈی پی ایس ورلڈ کی بین الاقوامی نمائش ایکسپو سینٹر لاہور میں منعقد ہو گی، سلیم خان تنولی

بدھ 23 جولائی 2025 22:30

لاہور (اُردو پوائنٹ اخبارتازہ ترین - اے پی پی۔ 23 جولائی2025ء) ڈیجیٹل پرنٹنگ اور سائن ایج انڈسٹری کی سب سے بڑی بین الاقوامی نمائش ڈی پی ایس ورلڈ پاکستان 2025ایکسپو سینٹر لاہور میں منعقد ہو گی،فیکٹ ایگزیبیشنز (پرائیویٹ) لمیٹڈ کے سی ای او سلیم خان تنولی نے کہا ہے کہ ڈیجیٹل پرنٹنگ، سائن ایج اور متعلقہ ٹیکنالوجیز پر مبنی ملک کی سب سے بڑی بین الاقوامی نمائش ڈی پی ایس ورلڈ پاکستان 2025کا انعقاد 25سے 27جولائی تک ایکسپو سینٹر لاہور میں ہو گا۔

بدھ کو میڈیا سے گفتگو کرتے ہوئے انہوں نے کہا کہ ایگزیبیشنز (پرائیویٹ) لمیٹڈ کے زیر اہتمام اس تین روزہ نمائش میں 100سے زائد مقامی اور بین الاقوامی کمپنیاں شرکت کریں گی ۔ یہ کمپنیاں جدید ترین مشینری، مصنوعات، ٹیکنالوجی اور سلوشنز پیش کریں گی، جو پرنٹنگ اور سائن ایج کے شعبے میں نمایاں تبدیلیوں کا باعث بنیں گی۔

(جاری ہے)

نمائش میں پیش کی جانے والی مصنوعات میں ڈیجیٹل پرنٹرز، ان میں ڈالنے والی سیاہی، لارج فارمیٹ ڈسپلے، لیزر کٹنگ مشینیں اور جدید سائن ایج سسٹمز شامل ہیں، جو اشتہارات، پیکجینگ، ریٹیل، ٹیکسٹائل اور برانڈنگ سمیت کئی صنعتوں کی ضروریات کو پورا کرنے کی صلاحیت رکھتی ہیں۔

انہوں نے کہاکہ ڈی پی ایس ورلڈ پاکستان 2025میں شرکا کو براہِ راست ڈیموز دیکھنے، نئی مصنوعات کی ایجادات میں شرکت کرنے اور دنیا بھر کے ماہرین، مینوفیکچررز، سپلائرز اور تکنیکی ماہرین سے ملاقات اور تبادلہ خیال کے مواقع میسر آئیں گے۔ یہ ایونٹ انڈسٹری اسٹیک ہولڈرز کے لیے سیکھنے، روابط بڑھانے اور مستقبل کی شراکت داریوں کے قیام کا ایک موثر پلیٹ فارم ثابت ہو گا۔