Live Updates

عمران خان کے بیٹوں کا حق ہے کہ وہ ضرور مہم چلائیں وہ جہاں جا رہے ہیں وہاں لوگوں کو بتائیں کہ ہمارے والد کوکرپشن پر سزا ہوئی ہے، عطاء تارڑ

بانی پی ٹی آئی کے بیٹے اپنے ساتھ 190 ملین پاؤنڈز کیس کی فیکٹ شیٹ ساتھ لے کر بھی جائیں اوروہ جس سے بھی ملتے ہیں تو یہ بتائیں کہ یہ کرپشن کا کیس ہے سیاسی نہیں، وفاقی وزیراطلاعات کی میڈیا سے گفتگو

فیصل علوی جمعرات 24 جولائی 2025 14:35

عمران خان کے بیٹوں کا حق ہے کہ وہ ضرور مہم چلائیں وہ جہاں جا رہے ہیں ..

اسلام آباد(اردوپوائنٹ اخبار تازہ ترین۔24جولائی 2025)وفاقی وزیر اطلاعات و نشریات عطاء تارڑکا کہنا ہے کہ بانی پی ٹی آئی عمران خان کے بیٹوں کا حق ہے کہ وہ ضرور مہم چلائیں، وہ جہاں جا رہے ہیں وہاں لوگوں کو بتائیں کہ ہمارے والد کو 190 ملین پاؤنڈز کرپشن کیس میں سزا ہوئی ہے،اسلام آباد میں میڈیا سے گفتگو کرتے ہوئے وفاقی وزیراطلاعات نے کہا کہ بانی پی ٹی آئی کے بیٹے اپنے ساتھ 190 ملین پاؤنڈز کیس کی فیکٹ شیٹ ساتھ لے کر بھی جائیں اور جس سے بھی ملتے ہیں تو یہ بتائیں کہ یہ کرپشن کا کیس ہے سیاسی نہیں۔

یہ تاثر دینے کی کوشش کی جا رہی ہے کہ 190 ملین پاؤنڈز کیس سیاسی کیس ہے جب کہ حقیقت یہ ہے کہ یہ کرپشن کا کیس ہے۔انہوں نے کہا کہ 190 ملین پاؤنڈز کیس میں بانی پی ٹی آئی اپنے حق میں کوئی شواہد پیش نہیں کر سکے۔

(جاری ہے)

یہ کہتے ہیں کہ ہم ریاست مدینہ کی بات کر رہے تھے تو ہمیں 190 ملین پاؤنڈز کیس میں سزا ہو گئی۔ 190 ملین پاؤنڈز کیس کا جواب مذہبی نہیں نہ ہی ریاست مدینہ ہے۔

آپ قوم کو بتائیں کہ آپ نے بزنس ٹائیکون کے اربوں روپے کس طرح استعمال کئے۔ اپنے والد کیلئے مہم چلانا بانی پی ٹی آئی کے بیٹوں کا حق ہے لیکن وہ اس دوران لوگوں کویہ بھی بتائیں کہ ان کے والد کو کرپشن کیس میں سزا ہوئی ہے۔ میڈیا سے گفتگو کرتے ہوئے وفاقی وزیرعطا ء تارڑ کا مزید کہناتھا کہ 9 مئی کے سانحے میں ملوث ملزمان کے خلاف شواہد موجود تھے۔

سی سی ٹی وی فوٹیج موجود تھیں، یہ معلوم تھا کہ ان واقعات میں کون ملوث تھے۔قبل ازیں اسلام آباد میں تقریب سے خطاب کرتے ہوئے وفاقی وزیر اطلاعات و نشریات عطاء اللہ تارڑ نے کہا کہ دہشتگردوں کا کوئی مذہب، رنگ اور نسل نہیں ہوتی، دہشتگردی صرف پاکستان کا نہیں پوری دنیا کا مسئلہ ہے۔ پاکستان دنیا کیلئے دہشتگردی کے خلاف ایک شیلڈ ہے۔ پاکستان نے دہشتگردی کے تدارک کیلئے غیر معمولی اقدامات کیے ہیں، ہم واحد ملک ہیں جہاں سکولوں کو بھی نشانہ بنایا گیا۔وفاقی وزیر نے مزید کہا کہ بلوچستان میں حالیہ افسوسناک واقعہ رونما ہوا ہے، بلوچستان میں دہشتگردی اورپرتشدد انتہا پسندی کا واقعہ ہوا ہے۔انہوں نے کہا کہ دہشتگردی کے خلاف نیا اقدام، پیغام امن کا اعلان کر رہا ہوں۔