اے بی ڈیویلیئرز کی آل ٹائم ورلڈ الیون میں پاکستانی فاسٹ بولر شامل

ڈی ویلیئرز نے انہیں مچل جانسن کو نئی گیند کے ساتھ شراکت داری کے لیے منتخب کیا

ذیشان مہتاب جمعہ 25 جولائی 2025 12:14

اے بی ڈیویلیئرز کی آل ٹائم ورلڈ الیون میں پاکستانی فاسٹ بولر شامل

لاہور (اردو پوائنٹ تازہ ترین اخبار ۔ 25 جولائی 2025ء ) جنوبی افریقا کے سابق کپتان اے بی ڈیویلیئرز نے اپنی آل ٹائم ورلڈ الیون میں پاکستان کے سابق فاسٹ بولر محمد آصف کو شامل کرلیا۔

ورلڈ چیمپئن شپ آف لیجنڈز میں اے بی ڈیویلیئرز جنوبی افریقا چیمپئنز کی قیادت کررہے ہیں، انہوں نے اپنی ڈریم الیون کا انتخاب کیا جس میں کرکٹ کے بڑے نام شامل ہیں۔

انہوں نے محمد آصف کو کئی دیگر نامور فاسٹ بولرز کے مقابلے میں منتخب کیا اور انہوں نے آصف کی دونوں جانب گیند کو سوئنگ کرنے کی صلاحیت کی تعریف کی۔

اے بی ڈیویلیئرز نے اوپنرز کے طور پر گریم اسمتھ اور میتھیو ہیڈن کو شامل کیا، اس کے بعد تیسرے نمبر پر رکی پونٹنگ کو رکھا۔

مڈل آرڈر میں ویرات کوہلی، سٹیو سمتھ اور کین ولیمسن اور ایم ایس دھونی کو بطور وکٹ کیپر منتخب کیا۔

(جاری ہے)

ڈیویلیئرز نے مچل جانسن کو محمد آصف کے ساتھ نئی گیند کے ساتھ پارٹنر بنایا۔

انہوں نے سپنرز میں شین وارن اور متھیا مرلی دھرن کو شامل کیا۔ انہوں نے میک گرا کو 12ویں کھلاڑی رکھا اور ان کی الیون میں انگلینڈ یا ویسٹ انڈیز کا کوئی کھلاڑی شامل نہیں۔

اے بی ڈی ویلیئرز کی آل ٹائم ورلڈ الیون:

گریم اسمتھ، میتھیو ہیڈن، رکی پونٹنگ، ویرات کوہلی، اسٹیو اسمتھ، کین ولیمسن، ایم ایس دھونی، مچل جانسن، محمد آصف، متھیا مرلی دھرن، شین وارن اور 12ویں کھلاڑی گلین میک گرا ہیں۔