Live Updates

ایشیا کپ: پاکستان کی عمان کیخلاف میچ کیلئے ممکنہ پلیئنگ الیون سامنے آگئی

آج عمان کیخلاف میچ پاکستان ٹیم کو دبئی کی کنڈیشنز میں کھیلنے کا ایک قیمتی موقع بھی فراہم کریگا جو اتوار کو بھارت کیخلاف میچ سے قبل کنڈیشن سمجھنے پر مدد فراہم کریگا

ذیشان مہتاب جمعہ 12 ستمبر 2025 11:24

ایشیا کپ: پاکستان کی عمان کیخلاف میچ کیلئے ممکنہ پلیئنگ الیون سامنے ..

دبئی (اردو پوائنٹ تازہ ترین اخبار ۔ 12 ستمبر 2025ء ) ایشیا کپ 2025 میں پاکستان ٹیم اپنی مہم کا آغا آج عمان کے خلاف میچ سے کرے گی جو دبئی اسٹیڈیم میں شام ساڑھے 7 بجے شروع ہوگا۔

ایک بین الاقوامی کرکٹ ویب سائٹ نے آج عمان کے خلاف پاکستان ٹیم کی ممکنہ پلیئنگ الیون جاری کردی ہے جس کے مطابق صاحبزادہ فرحان اور صائم ایوب اوپننگ کریں گے جبکہ فخر زمان تیسرے نمبر پر بیٹنگ کے لیے آئیں گے۔

ان کے بعد دیگر کھلاڑیوں میں سلمان علی آغا (کپتان)، حسن نواز، محمد حارث، محمد نواز، فہیم اشرف، شاہین آفریدی، حارث رؤف اور ابرار احمد شامل ہیں۔

خیال رہے کہ دبئی کی پچ کو ابوظہبی کے مقابلے میں زیادہ اسپن فراہم کرنے والی سمجھا جا رہا ہے، جو اس ٹورنامنٹ کا دوسرا وینیو ہے۔

(جاری ہے)

یہاں یہ بات قابل زکر ہے کہ آج عمان کے خلاف میچ پاکستان ٹیم کے لیے نہ صرف پوائنٹس ٹیبل پر اہمیت رکھتا ہے بلکہ دبئی کی کنڈیشنز میں کھیلنے کا ایک قیمتی موقع بھی فراہم کرے گا جو اتوار کو بھارت کے خلاف میچ سے قبل کنڈیشن سمجھنے پر مدد فراہم کرے گا۔

پاکستان ٹیم کا بولنگ کمبی نیشن کرکٹ حلقوں میں خاص توجہ کا مرکز بنا ہوا ہے کیونکہ ٹرائی نیشن سیریز میں صفیان مقیم اور ابرار احمد سمیت محمد نواز نے خطرے کی گھنٹی بجا دی ہے۔

دبئی میں پاکستان کا ٹی ٹونٹی کرکٹ میں حالیہ ریکارڈ کچھ اچھا نہیں ہے۔ پاکستان نے یہاں پر گذشتہ پانچ ٹی ٹونٹی میچز میں سے صرف ایک میں فتح حاصل کی ہے جو بھارت کے خلاف 2022ء کے ایشیا کپ میں تھی۔

میچ سے قبل پاکستان کرکٹ ٹیم کے ہیڈ کوچ مائیک ہیسن نے دبئی کی پچ کا معائنہ کیا اور پریس کانفرنس میں اُسے بیٹرز کیلئے سازگار قرار دیا، ہیسن کا کہنا تھا کہ پاکستانی ٹیم میں ملٹی اسکلز کھلاڑی موجود ہیں۔

دوسری جانب عمان کی ٹیم کے کپتان جدیندر سنگھ نے پریس کانفرنس میں کہا کہ پاکستانی ٹیم کا عمان سے کوئی مقابلہ نہیں ہے مگر ٹی 20 فارمیٹ میں کچھ بھی ہوسکتا ہے۔