گھوٹکی، ٹک ٹاکر سمیرا راجپوت پراسرار طور پر جاں بحق، پولیس نے دو ملزمان کو گرفتار کرلیا

گھوٹکی(اردوپوائنٹ اخبار تازہ ترین۔25جولائی 2025)سندھ کے علاقے گھوٹکی میں ٹک ٹاکر سمیرا راجپوت پراسرار طور پر جاں بحق، پولیس نے دو ملزمان علی راجپوت اور عدنان راجپوت کو گرفتار کرلیا ہے تاہم واقعے کا مقدمہ تاحال درج نہ ہوسکا، تفصیلات کے مطابق گھوٹکی کے ممتاز شاہ محلے میں معروف ٹک ٹاکر سمیرا راجپوت کی لاش ان کے گھر سے پراسرار حالت میں برآمد ہوئی۔

ابتدائی اطلاعات کے مطابق سمیرا کی موت زہریلی چیز کھانے سے واقع ہوئی تاہم موت کی حتمی وجہ جاننے کیلئے لاش کو تعلقہ ہسپتال گھوٹکی منتقل کر کے پوسٹ مارٹم کیلئے بھیج دیا گیا ہے۔ پولیس نے مقتولہ کے گھر سے شواہد اکھٹے کر لئے ہیں اور تفتیش کا دائرہ مزید وسیع کر دیا گیا ہے۔ ٹک ٹاکر سمیرا راجپوت کے بھائی نے الزام لگایا ہے کہ سمیرا کو اس کے سابق شوہر علی رضااور اس کے ساتھی عمران نے مبینہ طور پر زہردے کر قتل کیا ہے۔

(جاری ہے)

مقتولہ کی بیٹی نے بھی پولیس کو بتایا ہے کہ دونوں افراد سمیرا سے شادی کے خواہش مند تھے جس پر کئی مرتبہ تنازعہ بھی ہوا۔ پولیس کے مطابق سمیرا راجپوت نے تین سال قبل علی رضا نامی شخص سے طلاق لے لی تھی۔ پولیس نے ای سیکشن پولیس نے لاش پوسٹ مارٹم کے بعد ورثا کے حوالے کردی۔ یاد رہے کہ چند ماہ قبل پشاور کے علاقے ورسک روڈ پرمعروف خاتون ٹک ٹاکر سائیکو ارباب پراسرارطور پر جاں بحق ہوگئی تھیں جس کی نعش پوسٹمارٹم رپورٹ کیلئے ہسپتال منتقل کردی گئی تھی۔

پولیس نے گھر سے اہم شواہد اکٹھے کرکے انکوائری شروع کردی تھی۔ بتایا گیا تھا کہ خاتون ٹک ٹاکر کی ہلاکت سے مختلف خدشات ظاہر کئے جارہے تھے۔ تھانہ مچنی گیٹ پولیس کو بیان دیتے ہوئے محمد یسین ساکن اسلام آباد نے آکر بتایا تھا کہ اس کی بہن سیماگل عرف سائیکو ارباب مشہور ٹک ٹاکر تھی اسے اطلاع ملی کہ بہن گھرواقع ورسک روڈ میں موجود تھی جہاں اس کی حالت بگڑ گئی تھی۔

انہوں نے یہ خدشہ بھی ظاہر کیا تھا کہ اس کی موت مبینہ طورپر نشہ آور چیز کھانے سے ہوئی مگرانہوں نے یہ بھی کہا کہ اس کی طبعی موت بھی واقع ہوسکتی تھی۔ مدعی کا کہنا تھا کہ ہماری کسی کے ساتھ کوئی دشمنی نہیں تھی۔ دوسری جانب پولیس نے بتایاکہ نعش پوسٹمارٹم رپورٹ کیلئے منتقل کرکے گھر سے اہم شواہد اکٹھے کرلئے تھے۔ پوسٹمارٹم رپورٹ آنے کے بعد موت کی اصل وجہ معلوم ہوسکے گی۔

خیال رہے کہ متوفیہ ٹک ٹاک ویڈیوز بنا تی تھی جس کے کئی ویڈیوز بھی سوشل میڈیا پر موجود تھے۔ان کے ٹک ٹاک اکاؤنٹ پر 8 لاکھ 77 ہزار سے زائد فالوورز تھے جبکہ ٹک ٹاک پر ان کی ویڈیوز کو 18.9 ملین لائکس مل چکے تھے۔ ٹک ٹاکر سائیکو ارباب اپنے ٹک ٹاک اکاؤنٹ پر اپنے تخلیقی مواد، مزاحیہ ویڈیوز اور بولڈ اسٹیٹمنٹس کے باعث کافی مقبول تھیں اور ان کے مداح بڑی تعداد میں ان کی ویڈیوز دیکھنے کے منتظر رہتے تھے۔انہوں نے اپنی آخری ویڈیو پر پشتو زبان میں کچھ لائنز کی لپ سنگنگ کی تھی۔