سعودی عرب میں ٹریفک حادثہ، 7پاکستانی عمرہ زائرین جاں بحق

پاکستانی زائرین عرافات سے مدینہ جارہے تھے، تعلق بوئز کے ایک ہی خاندان سے تھا

جمعہ 25 جولائی 2025 21:25

سعودی عرب میں ٹریفک حادثہ، 7پاکستانی عمرہ زائرین جاں بحق

ریاض(اُردو پوائنٹ اخبارتازہ ترین - این این آئی۔ 25 جولائی2025ء)سعودی عرب میں عمرہ کی ادائیگی کے بعد سفر کے دوران ایک افسوسناک ٹریفک حادثے میں خیبر پختونخوا کے ضلع بونیر سے تعلق رکھنے والے 7 پاکستانی جاں بحق اور 6زخمی ہو گئے۔خاندانی ذرائع کے مطابق، بونیر کے علاقے ڈاگئی طوطالئی سے تعلق رکھنے والے 13افراد کا قافلہ عمرے کی ادائیگی کیلئے سعودی عرب گیا تھا۔

(جاری ہے)

حادثہ اس وقت پیش آیا جب زائرین عرفات سے مدینہ منورہ کی جانب سفر کر رہے تھے۔ اچانک پیش آنے والے ٹریفک حادثے میں قافلے کے 7افراد موقع پر جاں بحق ہو گئے، جبکہ دیگر 6افراد شدید زخمی ہوئے۔زخمیوں کو فوری طور پر قریبی پسپتال منتقل کیا گیا، جہاں انہیں طبی امداد دی جا رہی ہے۔ جاں بحق ہونے والے تمام افراد کا تعلق ایک ہی خاندان یا قریبی رشتہ داروں سے بتایا جا رہا ہے۔