ایف آئی اے تفتان سرکل کی کارروائی، غیرقانونی بارڈر کراسنگ میں ملوث 4 ملزمان گرفتار

ْگرفتار افغان باشندے کی نشاندہی پر انسانی اسمگلر گل احمد اور عبدالرحیم کو گرفتار کیا گیا

ہفتہ 26 جولائی 2025 16:40

ایف آئی اے تفتان سرکل کی کارروائی، غیرقانونی بارڈر کراسنگ میں ملوث ..

اسلام آباد (اُردو پوائنٹ اخبارتازہ ترین - این این آئی۔ 26 جولائی2025ء)وفاقی تحقیقاتی ادارے (ایف آئی ای) کے انسداد انسانی اسمگلنگ سرکل تفتان نے کارروائی کرتے ہوئے انسانی اسمگلنگ اور غیر قانونی بارڈر کراسنگ میں ملوث 4 ملزمان کو گرفتار کرلیا۔ ترجمان ایف آئی اے نے بتایا کہ گرفتار ملزمان میں عمید، گل احمد، عبدالرحیم اور برہان خان شامل ہیں، گرفتار ملزم عمید نے غیر قانونی طور پر ایران جانے کی کوشش کی، ملزم عمید کا تعلق افغانستان سے ہے۔

ترجمان ایف آئی اے کے مطابق ملزم کو غیر قانونی طور پر تفتان بارڈر پار کرتے ہوئے گرفتار کیا گیا، ملزم کی نشاندہی پر انسانی اسمگلر گل احمد اور عبدالرحیم کو گرفتار کیا گیا۔ایف آئی اے کے ترجمان نے بتایا کہ گرفتار ملزم برہان خان کے پاسپورٹ پر امیگریشن کی جعلی اسٹیمپ لگی ہوئی تھی۔

(جاری ہے)

ملزم برہان خان اس سے قبل ترکیہ سے ڈی پورٹ بھی ہوچکا ہے، ملزمان کو گرفتار کر کے تفتیش کا اغاز کر دیا گیا ہے۔

یاد رہے کہ جولائی میں ایف آئی اے کے اینٹی ہیومن ٹریفکنگ سرکل تفتان کی کارروائیوں میں اب تک مجموعی طور پر 57 ملزمان کو گرفتار کیا جاچکا ہے، جن میں غیر ملکیوں کی بڑی تعداد شامل ہے۔دوسری جانب ایف آئی اے گوجرانوالہ زون نے پاسپورٹ ایجنٹ مافیا اور بدعنوانی میں ملوث عناصر کے خلاف کارروائیاں کرتے ہوئے 7 ملزمان کو گرفتار کرلیا۔ایف آئی اے کمپوزٹ سرکل گجرات نے پاسپورٹ آفس منڈی بہاالدین میں چھاپہ مار کارروائی کی، گرفتار ملزمان میں پاسپورٹ آفس کے اہلکار بھی شامل ہیں۔

گرفتار ملزمان میں محمد شریف، کلیم اللہ، راجا زبیر، راجا عامر، علی احمد، ندیم عباس اور حماد علی شامل ہیں۔ترجمان ایف آئی اے کے مطابق ملزمان شہریوں سے جلد پاسپورٹ دلوانے کا جھانسہ دے کر بھاری رقم بٹورنے میں ملوث پائے گئے، چھاپہ مار کارروائی میں ملزمان کے قبضے سے بینک چالان، ٹوکن کی فوٹو کاپیاں، برتھ سرٹیفکیٹ برآمد کیے گئے۔ملزمان سے (ب) فارم، نادرا فیملی ٹری سرٹیفکیٹس، موبائل فونز اور 2 لاکھ روپے سے زائد برآمد کیے گئے، ملزمان کو گرفتار کر تفتیش شروع کردی گئی ہے۔ترجمان ایف آئی اے کے مطابق نیٹ ورک میں شامل دیگر سہولت کاروں کی گرفتاری کے لیے کارروائیاں جاری ہیں۔