اسلام آباد فوڈ اتھارٹی کا ترنول میں چھاپہ،25 من گدھے کا گوشت برآمد

ہفتہ 26 جولائی 2025 23:30

اسلام آباد (اُردو پوائنٹ اخبارتازہ ترین - اے پی پی۔ 26 جولائی2025ء) اسلام آباد فوڈ اتھارٹی نے ترنول میں چھاپہ مار کر25 من گدھے کا گوشت برآمد کر کےملوث افراد کے خلاف فی الفور اندراج مقدمہ کا حکم دیا ہے۔ہفتہ کو ضلعی انتظامیہ کی جانب سے جاری بیان کے مطابق لاہور کے بعد اسلام آباد میں بھی گدھے کا گوشت برآمد ہوا۔ترنول میں پچاس سے زائد گدھے اور بڑی مقدار میں ان کا گوشت برآمد کر لیا گیا۔

اسلام آباد فوڈ اتھارٹی کی جانب سے بڑی کارروائی کی گئی ،ڈپٹی ڈائریکٹر اسلام آباد فوڈ اتھارٹی ڈاکٹر طاہرہ صدیق موقع پر موجود تھیں۔

(جاری ہے)

ڈائریکٹر فوڈ اتھارٹی کی جانب سے ملوث افراد کے خلاف فی الفور اندراج مقدمہ کا حکم دیا گیاہے۔فوڈ اتھارٹی ٹیم کی جانب سے گوشت کو تلف کرنے کا سلسلہ جاری ہے۔ ڈپٹی ڈائریکٹر فوڈ اتھارٹی ڈاکٹر طاہرہ صدیق نے کہا کہ فوڈ اتھارٹی ٹیم کی جانب سے ٹوٹل 25 من گوشت برآمد کیا گیا،موقع پر موجود ایک غیر ملکی شہری کو پولیس کے حوالے کر دیا گیا،گوشت کن کن ایریاز میں سپلائی کیا گیا، تفتیش جاری ہے،گوشت کو غیر ملکی شہریوں کے کھانے کے لیے استعمال کرنے کی تحقیقات جاری ہیں۔

ڈپٹی ڈاریکٹر فوڈ اتھارٹی نے کہا کہ شہر میں محفوظ غذا کی فراہمی کے لیے فوڈ اتھارٹی دن رات کوشاں ہے۔