ورلڈ چیمپئن شپ آف لیجنڈز‘ پاکستان نے ویسٹ انڈیز کو 49 رنز سے شکست دیدی

کامران اکمل نے شاندار سنچری اسکور کی اور 62 گیندوں پر 113 رنز بنائے‘پاکستان کی پوزیشن مستحکم ہوگئی

اتوار 27 جولائی 2025 11:35

لندن (اُردو پوائنٹ اخبارتازہ ترین - این این آئی۔ 27 جولائی2025ء) ورلڈ چیمپئن شپ آف لیجنڈز میں پاکستان چیمپئنز نے عمدہ کارکردگی کا مظاہرہ کرتے ہوئے ویسٹ انڈیز چیمپئنز کو 49 رنز سے شکست دے دی۔انگلینڈ میں جاری ورلڈ چیمپئن شپ آف لیجنڈز میں پاکستان چیمپئنز نے پہلے بیٹنگ کرتے ہوئے 20 اوورز میں 200 رنز بنائے اور ویسٹ انڈیز چیمپئنز کو جیت کے لیے 201 رنز کا ہدف دیا۔

(جاری ہے)

پاکستان کی جانب سے کامران اکمل نے شاندار سنچری اسکور کی اور 62 گیندوں پر 113 رنز بنائے جبکہ کپتان محمد حفیظ نے 23 رنز اسکور کیے۔ پاکستان کے جواب میں بیٹنگ کرتے ہوئے ویسٹ انڈیز چیمپئنز 20 اوورز میں 7 وکٹوں کے نقصان پر 151 رنز ہی بناپائی اور 49 رنز سے شکست کھا گئی۔ ویسٹ انڈیز چیمپئنز کی جانب سے چدوک والٹن نے 42 رنز کی اننگز کھیلی، ولیم پرکنز 30 اور ڈیوائن براوو بھی 30 رنز بناسکے۔واضح رہے اس سے قبل گزشتہ روز پاکستان چیمپئنز نے جنوبی افریقا چیمپئنز کو 31 رنز سے شکست دی تھی جبکہ اپنے پہلے میچ میں انگلینڈ کو ہرایا تھا۔ اس فتح کے بعد پاکستان چیمپئنز نے ٹورنامنٹ میں اپنی پوزیشن مزید مستحکم کرلی ہے۔