شوگرملز نے ڈیلرز کیلئے جی ایس ٹی سرٹیفکیٹ کی شرط رکھ دی

شوگرملز سے عدم سپلائی سے چینی بحران سنگین ہونے کا خدشہ

اتوار 27 جولائی 2025 21:20

کراچی(اُردو پوائنٹ اخبارتازہ ترین - این این آئی۔ 27 جولائی2025ء)شوگرملز نے ڈیلرز کیلئے جی ایس ٹی سرٹیفکیٹ کی شرط رکھ دی۔ڈیلرز اور ہول سیلرزکی بڑی تعداد سیلزٹیکس میں غیررجسٹرڈ ہے۔ شوگر ملز سے عدم سپلائی سے مارکیٹ میں چینی بحران سنگین ہونے کا خدشہ پیدا ہوگیا۔ مارکیٹ میں چینی200 روپے فی کلوسے زائد میں فروخت ہونے لگی۔ دوسری جانب وفاقی حکومت نے چینی کے کاروبار میں سٹہ بازی کرنے والوں کے خلاف سخت اقدامات شروع کر دیے ہیں اور ذرائع وزارت پیداوار کے مطابق چینی کے سٹہ پر مکمل پابندی عائد کر دی گئی ہے۔

(جاری ہے)

ذرائع کے مطابق متعدد شوگر ملز مالکان اور ڈیلرز کو بیرون ملک سفر سے روکنے کے لیے ان کے نام ایگزٹ کنٹرول لسٹ (ای سی ایل) میں ڈالنے کا عمل شروع کر دیا گیا ہے۔ پہلے مرحلے میں شوگر ڈیلرز کے نام ای سی ایل پر ڈالنے کی کارروائی کا آغاز ہو چکا ہے۔واضح رہے کہ اس سے قبل دسمبر میں چینی برآمد کرنے والے شوگر ملز مالکان، ڈیلرز اور متعلقہ بیوروکریٹس سے باز پرس بھی کی گئی تھی۔حکومت کی جانب سے ان اقدامات کا مقصد چینی کی قیمتوں میں استحکام لانا اور مصنوعی قلت پیدا کرنے والے عناصر کے خلاف سخت کارروائی کرنا ہے۔