پاکستان سپورٹس بورڈ نے ’ٹرم رولز 2025‘ نافذ کر دیئے ، صدر ہی اعلیٰ عہدہ، 70 سال عمر حد، خلاف ورزی پر 6 سال پابندی یا تاحیات نااہلی

اسلام آباد (اُردو پوائنٹ اخبارتازہ ترین - اے پی پی۔ 28 جولائی2025ء) پاکستان سپورٹس بورڈ (پی ایس بی)نے نیشنل سپورٹس پالیسی 2005 کے تسلسل میں پالیسی کی وضاحت کرتے ہوئے سپورٹس فیڈریشنز کے لیے نئے "ٹرم رولز 2025" نافذ کر دیے ہیں ، رولز کے مطابق فیڈریشنز میں صدر کا عہدہ سب سے اعلیٰ تصور ہوگا، اس کے علاوہ چیئرمین، سی ای او یا کوئی متبادل عہدہ قابل قبول نہیں ہوگا۔

کسی بھی فرد کے لیے زیادہ سے زیادہ عمر کی حد 70 سال مقرر کی گئی ہے، جس کے بعد عہدہ خود بخود ختم تصور ہوگا۔ کوئی فرد ایک وقت میں ایک سے زائد فیڈریشنز میں عہدہ نہیں رکھ سکے گا۔ فیڈریشنز کو اپنی ساخت ان قواعد کے مطابق ہم آہنگ کرنے کے لیے 90 روز کی مہلت دی گئی ہے۔نوٹیفکیشن کے مطابق یہ ٹرم رولز چھ شقوں اور چوبیس ذیلی شقوں پر مشتمل ہیں اور فوری طور پر نافذ العمل ہیں۔

(جاری ہے)

نئے رولز کے تحت کوئی بھی عہدیدار فیڈریشن میں زیادہ سے زیادہ دو مدتوں (ہر ایک چار سال) تک خدمات انجام دے سکے گا، یوں کسی ایک عہدے پر کل 8 سال سے زائد نہیں رہا جا سکے گا۔ اسی طرح کوئی فرد کسی اعلیٰ عہدے پر خدمات کے بعد پچھلے درجے کے عہدے کے لیے الیکشن نہیں لڑ سکے گا۔ اگر کوئی عہدہ دوران مدت خالی ہو جائے تو اس پر انتخاب کے ذریعے تقرری کی جائے گی اور منتخب فرد کی مدت صرف باقی ماندہ مدت سمجھی جائے گی، جو 8 سالہ حد میں شمار ہوگی۔

ان رولزکی خلاف ورزی کی صورت میں ڈائریکٹر جنرل پاکستان سپورٹس بورڈ تحقیقات کا مجاز ہوگا، اور ثابت ہونے پر عہدیدار پر کم از کم 4اور زیادہ سے زیادہ 6 سال کی پابندی عائد کی جا سکتی ہے۔ پابندی کے دوران مذکورہ فرد مالی معاونت، گرانٹس، سہولیات، مشاورتی کردار یا رکنیت سمیت کسی فائدے کا اہل نہیں ہوگا۔ خلاف ورزی کو نظرانداز کرنے پر ڈی جی حکومت کو قانونی یا انتظامی کارروائی کی سفارش کر سکتا ہے۔

بار بار خلاف ورزی پر تاحیات نااہلی کی سزا بھی دی جا سکتی ہے۔ رولز کے مطابق پاکستان سپورٹس بورڈ ایک مرکزی ڈیٹا بیس قائم کرے گا اور نااہل افراد کی فہرست اپنی ویب سائٹ پر شائع کرے گا۔ فیصلے سے متاثرہ افراد پینل آف ایڈجوڈیکیٹر میں تحریری اپیل دائر کر سکتے ہیں، جو "کوڈ آف ایتھکس اینڈ گورننس ان اسپورٹس" کی متعلقہ شقوں کے تحت نمٹائی جائے گی۔ عدم تعمیل کی صورت میں فیڈریشنز کی فنڈنگ روکی جا سکتی ہے یا الحاق منسوخ کیا جا سکتا ہے۔