بھارت نہیں کھیلے گا تو ٹورنامنٹ بھی نہیں ہوسکتا، ہندوستانی میڈیا ایشیاء کپ ختم کرانے پر تُل گیا

مودی سرکار ایشیاء کپ میں پاکستان کو واک اوور دینے کے حق میں نہیں ہے، بھارتی میڈیا کا دعویٰ

ذیشان مہتاب منگل 29 جولائی 2025 14:26

بھارت نہیں کھیلے گا تو ٹورنامنٹ بھی نہیں ہوسکتا، ہندوستانی میڈیا ایشیاء ..

لاہور (اردو پوائنٹ تازہ ترین اخبار ۔ 29 جولائی 2025ء ) ایشیاء کپ کے اپنے میدانوں سے رخصتی کے صدمے سے دوچار بھارتی میڈیا، سابق کرکٹرز اور سیاستدانوں کا رونا دھونا جاری ہے۔

بھارتی ایوانوں کے ساتھ ساتھ میڈیا پر مودی سرکار سے ایشیاء کپ کے بائیکاٹ کا مطالبہ بڑھ رہا ہے، ایشین کرکٹ کونسل کے صدر محسن نقوی کے اجلاس کے انعقاد اور ایونٹ کے اعلان کے بعد سے بھارتی بورڈ کو آڑے ہاتھوں لیا جارہا ہے۔

بھارتی میڈیا دعویٰ کررہا ہے کہ مودی سرکار ایشیاء کپ میں پاکستان کو واک اوور دینے کے حق میں نہیں ہے، پاکستان کو کسی صورت واک اوور نہیں دیا جائے گا، اگر واک اوور دیا تو پاکستان جیت جائے گا۔

بھارتی میڈیا کا کہنا ہے کہ ایشیاء کپ بھارت کا ٹورنامنٹ ہے اس میں پاکستان کے ساتھ نہیں کھیلنا چاہیے، بھارت نہیں کھیلے گا تو ٹورنامنٹ بھی نہیں ہوسکتا، بھارت کی میزبانی میں ہونے والے ٹورنامنٹ میں پاکستان کا کھیلنا کسی صورت قبول نہیں۔

(جاری ہے)

اس کے علاوہ بھارتی ایوانوں میں بھی ایشیاء کپ کے بائیکاٹ کی ڈیمانڈ ہورہی ہے، بھارتی ایوانوں میں اپوزیشن نے مودی سرکار پر تنقید کرتے ہوئے کہا کہ پاکستان کے ساتھ تجارت سمیت سب کچھ بند ہے تو کرکٹ کیوں ہو رہی ہے۔

واضح رہے کہ ایشیاء کپ بھارت کی میزبانی میں یو اے ای میں 9 ستمبر سے کھیلا جائے گا، ایشیاء کپ میں پاک بھارت کم از کم دو جب کہ زیادہ سے زیادہ تین مرتبہ آمنے سامنے آ سکتے ہیں۔