ملک میں پہلی نیشنل یوتھ گیمز سے گراس روٹ سطح پر نیا ٹیلنٹ سامنے آئے گا، صباء شمیم جدون

منگل 29 جولائی 2025 15:59

اسلام آباد(اُردو پوائنٹ اخبارتازہ ترین - این این آئی۔ 29 جولائی2025ء)پاکستان اولمپک ایسوسی ایشن خواتین کمیشن کی رکن صباء شمیم جدون نے کہا ہے کہ ملک میں پہلی نیشنل یوتھ گیمز سے گراس روٹ سطح پر نیا ٹیلنٹ سامنے آئے گا۔ ان خیالات کا اظہار انہوں نے گزشتہ روز میڈیا سے گفتگو کرتے ہوئے کیا۔

(جاری ہے)

انہوں نے کہا کہ نیشنل یوتھ گیمز ملک میں پہلی بار منعقد ہورہے ہیں،یہ حکومت اور پاکستان اولمپک ایسوسی ایشن کا نیشنل یوتھ گیمز منعقد کرانے کا بہت اہم فیصلہ ہے، یہ گیمز ستمبر میں اسلام آباد میں منعقد ہوں گے۔

انہوں نے کہا کہ گیمز میں تعلیمی اداروں کے طلباء و طالبات کو کھیلوں میں قسمت آزمائی کا بہت بڑا موقع ملے گا اور گیمز میں ا چھی کارکردگی دکھانے والے کھلاڑی یقیناً بین الاقوامی سطح پر ملک و قوم کا نام روشن کریں گے۔ ایک سوال کے جواب میں صباء شمیم جدون نے کہا کہ ایک دور ایسا تھا کہ پاکستان نے دنیا بھر میں کھیلوں کے میدان میں دنیا پر کئی دہائیوں تک حکمرانی قائم کر رکھی تھی جس میں پاکستان کا قومی کھیل ہاکی، سکواش، کرکٹ اور سنوکر شامل تھے۔