الیکٹرک بسوں کے اجرا سے عوام کو بہتر سفری سہولتوں کی فراہمی میں مدد ملے گی

منگل 29 جولائی 2025 16:50

سرگودھا (اُردو پوائنٹ اخبارتازہ ترین - اے پی پی۔ 29 جولائی2025ء) حکومت کی جانب سے سرگودھا میں الیکٹرک بسوں کے اجراسے نہ صرف عوام کو بہتر سفری سہولتوں کی فراہمی میں مدد ملے گی بلکہ جگہ جگہ چلنے والے چنگچی رکشوں سے بھی لوگوں کی جان چھوٹ جائے گی جو حادثات کا موجب بننے کے ساتھ ساتھ شہر میں آلودگی کا باعث بھی ہیں۔ان خیالات کا اظہار خاتم النبیین ہارٹ سینٹر کے سرپرست ی مدبر احمد خان نے اپنے ایک بیان میں کیا ۔

(جاری ہے)

انہوں نے کہا کہ حکومت پنجاب کی جانب سے سرگودھا سمیت پنجاب بھر کے مختلف شہروں میں الیکٹرک بسوں کے اجراسے نہ صرف ماحولیاتی آلودگی پر قابو پانے میں مدد ملے گی بلکہ اس سے بہتر سفری سہولیات کی فراہمی میں بھی لوگوں کو آسانی ہو گی ۔مدبر احمد خان نے کہا کہ حکومت پنجاب کے متعدد اقدامات ایسے ہیں جو یقیناً ملک و قوم کے ساتھ ساتھ عوام کے بہتر مفاد میں ہیں ۔اس طرح کے اقدامات سے نہ صرف پاکستان ترقی کرے گا بلکہ عوام کو بہتر سہولتوں کی فراہمی میں بھی مدد ملے گی ۔مدبر احمد خان کا مزید کہنا تھا کہ الیکٹرک بسوں کا اجراجلد از جلد کیا جائے اور اس کو بین الاضلاعی روٹس پر بھی چلایا جائے۔