شہر قائد کے علاقے نیو کراچی کے ایک گھر سے 27 سالہ شخص کی لاش برآمد

منگل 29 جولائی 2025 17:20

کراچی(اُردو پوائنٹ اخبارتازہ ترین - این این آئی۔ 29 جولائی2025ء)شہر قائد کے علاقے نیو کراچی کے ایک گھر سے 27 سالہ شخص کی لاش برآمد ہوئی ہے جسے مبینہ طور پر تشدد سے ہلاک کیا گیا ہے۔تفصیلات کے مطابق نیو کراچی سیکٹر فائیو جی میں واقع خضرا مسجد کے قریب ایک گھر سے 27 سالہ شخص کی لاش برآمد ہوئی ہے۔پولیس حکام کے مطابق اطلاع ملتے ہی پولیس اہلکاروں نے لاش تحویل میں لے لی، متوفی کی شناخت محمد حسین کے نام سے ہوئی ہے، لاش کو عباسی شہید اسپتال منتقل کردیا گیا۔

(جاری ہے)

پولیس کے مطابق حسین اپنے چھوٹے بھائی سلمان کے ساتھ کرائے کے مکان میں رہائش پذیر تھا، سلمان نے بیان دیا ہے کہ صبح کام پر جاتے وقت بھائی حسین گھر میں سورہا تھا۔چھوٹے بھائی نے بتایا کہ جب شام کو کام سے واپس آیا تو حسین کی لاش کمرے میں پڑی ملی، حسین پان کا ٹھیہ لگاتا تھا اور غیر شادی شدہ تھا۔ابتدائی تحقیقات میں پولیس نے کہاکہ بظاہر لگتا ہے کہ حسین کو تشدد کا نشانہ بنا کر قتل کیا گیا ہے،تاہم موت کی اصل وجہ پوسٹ مارٹم رپورٹ کے آنے کے بعد ہی واضح ہوگی۔