نان ممبرز کی جانب سے اپوزیشن ارکان کو دھمکیاں دینے کے واقعہ کی انکوائری کا حکم دیدیا‘ قائمقام اسپیکر

منگل 29 جولائی 2025 17:20

لاہور(اُردو پوائنٹ اخبارتازہ ترین - این این آئی۔ 29 جولائی2025ء)قائمقام اسپیکر ظہیر اقبال چنڑ نے نان ممبرز کی جانب سے اپوزیشن ارکان کو دھمکیاں دینے کے واقعہ کی انکوائری کا حکم دیتے ہوئے کہا ہے کہ یہ اقدام کسی صورت بھی قابل قبول نہیں ،حکومتی اور اپوزیشن نے باہمی اتفاق سے ایوان میں نظم و ضبط برقرار رکھنے اوربدتمیزی نہ کرنے کا وعدہ کیا گیا ، اسپیکر کی رولنگ کے باوجود ایوان میں ناخوشگوار واقعہ پیش آیا، ایک رکن کا دوسرے پر حملہ ایوان کے تقدس کے خلاف ہے۔

پنجاب اسمبلی کے احاطے میں میڈیاسے گفتگو کرتے ہوئے قائمقام اسپیکر ظہیراقبال چنڑ نے کہا کہ اسمبلی 12 کروڑ عوام کی نمائندہ ہے یہاں غیرمہذب رویے ناقابل قبول ہیں، ایوان کو مچھلی منڈی میں تبدیل کرنے کی مذمت کرتا ہوں، یہ پنجاب اسمبلی میں سیاہ دن تھا۔

(جاری ہے)

انہوںنے کہا کہ اسپیکر کی رولنگ کی خلاف ورزی کسی صورت برداشت نہیں ، واقعہ پر آئین اوررولز کے تحت قصور وار رکن کی معطلی کی گئی ۔

انہوںنے ایوان کے باہر نان ممبرز کی جانب سے اپوزیشن اراکین کو دھمکیاں دینے کے حوالے سے کہا کہ میں نے بھی یہ سوشل میڈیاپردیکھا ہے ،نان ممبرز کی جانب سے ایوان کے باہر اپوزیشن اراکین کو دی جانے والی دھمکیاں ناقابل قبول ہیں، اسمبلی سیکرٹریٹ کو دھمکی آمیز رویے کی مکمل انکوائری کا حکم دے دیا ہے۔ انہوںنے کہا کہ پہلے تو اسمبلی میں لڑائی ہی نہیں ہونی چاہیے ،اسمبلی کی لڑائی میں باہر کے افراد کی مداخلت ناقابل برداشت ہے، سوشل میڈیا پر وائرل ویڈیوز میں ہلڑ بازی کرنے والوں کی شناخت ہو چکی ہے، ایوان کے تقدس کو پامال کرنے والے افراد کے خلاف سخت کارروائی ہوگی۔