آزاد جموں وکشمیر الیکشن کمیشن اور انفارمیشن ٹیکنالوجی بورڈ کا انتخابی قواعد کی تیاری کے لئے نادرا کے ساتھ معاہدہ طے پا گیا

منگل 29 جولائی 2025 19:02

مظفرآباد (اُردو پوائنٹ اخبارتازہ ترین - اے پی پی۔ 29 جولائی2025ء) آزاد جموں وکشمیر الیکشن کمیشن اور انفارمیشن ٹیکنالوجی بورڈ کا آزاد جموں وکشمیر میں کمپیوٹرائزڈ انتخابی قواعد کی تیاری کے حوالہ سے نادرا کے ساتھ معاہدہ طے پا گیا۔ منگل کو ترجمان آزاد جموں وکشمیر الیکشن کمیشن کی جانب سے جاری کردہ پریس ریلیز کے مطابق معاہدہ پر دستخط کی تقریب نادرا ہیڈ کوارٹرز اسلام آباد میں منعقد ہوئی۔

معاہدے پر سیکرٹری الیکشن کمیشن آزاد جموں وکشمیر راجہ محمد شکیل خان ،سیکرٹری انفارمیشن ٹیکنالوجی راشد حنیف اور چیف پراجیکٹ آفیسر نادرا رحمان قمر نے دستخط کئے۔اس موقع پر ممبر الیکشن کمیشن آزاد جموںو کشمیر سید نظیر الحسن گیلانی اور چیئرمین نادرا لیفٹینٹف جنرل محمد منیر افسربھی موجود تھے ۔

(جاری ہے)

معاہدے کے تحت نادرا آزاد جموں وکشمیر الیکشن کمیشن کو کمپیوٹرائزڈ الیکٹو رل رول سسٹم تیار کر کے دینے کے علاوہ کمیشن کے 10ضلعی اور4 دیگر دفاتر میں اس سسٹم کی تنصیب بھی عمل میں لائے گا ۔

نادرا کمیشن کواس سسٹم کے لئےاستعمال ہونے والا سافٹ ویئر اور ہارڈ ویئربھی فراہم کرے گااوراس جدید ترین ٹیکنالوجی کے استعمال کے لئے آزاد جموں وکشمیر الیکشن کمیشن کے متعلقہ عملہ کی استعداد کار بڑھانے کے لئے ان کی ضروری تربیت کے اہتمام کے علاوہ اس سسٹم کو مکمل طور پر فعال رکھنے کے لئے کمیشن کی ہر طرح کی تکنیکی اور فنی معاونت بھی کرے گا۔

آزاد جموں و کشمیر الیکشن کمیشن کے مرکزی اور ضلعی دفاتر میں اس سسٹم کی تنصیب کے بعد انتخابی فہرستوں کی تیاری اوران میں ووٹوں کے اندراج ،اخراج ،تبدیلی اور درستگی وغیرہ سے متعلقہ جملہ امور اور حلقہ بندیوں کی تجدیدو تشکیل سے متعلقہ تمام تر معاملات جدید ترین انفارمیشن ٹیکنالوجی کی مد د سے انجام پذیر ہونا شروع ہو جائیں گے۔آزاد جموں وکشمیر الیکشن کمیشن میں کمپیوٹرائزڈ الیکٹو رل رول سسٹم کا استعمال آئندہ ہونے والے عام انتخابات اور لوکل باڈیز کے انتخابات کو صاف و شفاف بنانے اور انتخابی عمل پررائے دہندگان کا اعتماد بڑھانے کی جانب ایک انقلابی قدم ہو گا۔