انسانی سمگلنگ سنگین جرم، حکومت جڑ سے ختم کرنے کیلئے پرعزم ہی: وزیراعظم

بدھ 30 جولائی 2025 13:26

اسلام آباد(اُردو پوائنٹ اخبارتازہ ترین - این این آئی۔ 30 جولائی2025ء) وزیراعظم شہباز شریف نے کہا ہے کہ انسانی سمگلنگ ایک سنگین منظم جرم ہے، حکومت اسے جڑ سے ختم کرنے کے لیے پرعزم ہے۔انسانی سمگلنگ کے خلاف عالمی دن کے موقع پر وزیراعظم محمد شہباز شریف نے اپنے پیغام میں کہا ہے کہ یہ دن ہر سال انسانی سمگلنگ جیسے بھیانک اور منظم جرم کی روک تھام، اس کے محرکات اور مکروہ اثرات کو اجاگر کرنے کے ساتھ ساتھ عوامی شعور بیدار کرنے کے لیے منایا جاتا ہے۔

اس سال یہ دن ''انسانی سمگلنگ ایک منظم گروہی جرم، استحصال کا خاتمہ'' کے عنوان کے تحت منایا جا رہا ہے۔وزیراعظم نے کہا ہے کہ جرائم پیشہ گروہ دنیا بھر میں فکر معاش میں مبتلا افراد کو جھوٹے خواب دکھا کر انسانی سمگلنگ کا نشانہ بناتے ہیں جس سے وہ بدترین استحصال سے دوچار ہوتے ہیں۔

(جاری ہے)

شہباز شریف نے بتایا کہ پاکستان میں گزشتہ برسوں کے دوران تارکین وطن کی سمندر میں جانوں کے ضیاع جیسے افسوسناک واقعات نے انسانی سمگلنگ کی ہولناک حقیقت کو بے نقاب کیا، وفاقی حکومت نے اس سنگین مسئلے سے نمٹنے کے لیے ایک خصوصی ٹاسک فورس تشکیل دی ہے جو اس جرم میں ملوث عناصر کو کیفر کردار تک پہنچانے کے لیے مؤثر اور بھرپور اقدامات کر رہی ہے۔

وزیراعظم نے ایف آئی اے، انٹیلیجنس بیورو اور دیگر قانون نافذ کرنے والے اداروں کی کاوشوں کو سراہتے ہوئے کہا کہ ان کی محنت سے انسانی سمگلنگ کی کارروائیوں میں نمایاں کمی آئی ہے اور کئی سرکاری اہلکاروں کو بھی قانون کے کٹہرے میں لایا گیا ہے۔انہوں نے کہا ہے کہ حکومت عوام کو بیرون ملک قانونی روزگار کے مواقع اور ان کے محفوظ طریقہ کار سے آگاہ کرنے کے لیے مسلسل اقدامات کر رہی ہے، پاکستان کے شہریوں کی معاشی ترقی کے لیے اندرون و بیرون ملک روزگار کے بہتر مواقع پیدا کیے جا رہے ہیں۔

وزیراعظم نے خبردار کیا کہ بہتر مستقبل کی تلاش میں غیر قانونی یا گمراہ کن راستوں کا انتخاب نہ صرف جان کے ضیاع کا سبب بن سکتا ہے بلکہ ملکی اور بین الاقوامی قوانین کی بھی سنگین خلاف ورزی ہے۔شہباز شریف نے عوام، میڈیا، سول سوسائٹی اور بین الاقوامی شراکت داروں پر زور دیا کہ وہ انسانی سمگلنگ کے خلاف آگہی مہمات میں حکومت کا ساتھ دیں تاکہ ایک محفوظ، باوقار اور استحصال سے پاک معاشرہ تشکیل دیا جا سکے۔