اسٹیٹ بینک آف پاکستان پالیسی ریٹ میں بتدریج کمی کر کے اسے سنگل ڈیجٹ تک لائے، افتخار علی ملک

بدھ 30 جولائی 2025 20:30

اسلام آباد (اُردو پوائنٹ اخبارتازہ ترین - اے پی پی۔ 30 جولائی2025ء) سارک چیمبر آف کامرس اینڈ انڈسٹری کے سابق صدر افتخار علی ملک نے اسٹیٹ بینک آف پاکستان پر زور دیا ہے کہ وہ پالیسی ریٹ میں بتدریج کمی کر کے اسے سنگل ڈیجٹ تک لائے۔ بدھ کو جاری ایک بیان میں انہوں نے کہا کہ پالیسی ریٹ کم کرنے سے بزنس خاص طور پر چھوٹے اور درمیانے درجے کے کاروباری اداروں کو سستے قرضوں تک رسائی حاصل ہو سکے گی جس سے معاشی سرگرمیوں کو فروغ ملے گا، روزگار کے مواقع پیدا ہوں گے اور برآمدات میں اضافہ ہوگا۔

انہوں نے کہا کہ موجودہ بلند شرح سود سرمایہ کاری کے لئے موافق نہیں کیونکہ پہلے سے ہی افراط زر اور معاشی چیلنجز سے نبرد آزما صنعتوں پر زیادہ مالی بوجھ پڑتا ہے۔ انہوں نے پالیسی سازوں پر زور دیا کہ وہ مقامی صنعتوں کی ترقی اور معاشی استحکام کو فروغ دینے کے لئے کاروبار دوست مالیاتی پالیسیاں متعارف کرائیں۔

(جاری ہے)

افتخار علی ملک نے کہا کہ پالیسی ریٹ میں بتدریج کمی سے سرمایہ کاروں کا اعتماد بحال ہوگا اور براہ راست غیر ملکی سرمایہ کاری کو راغب کرنے میں مدد ملے گی۔ انہوں نے کہا کہ آسان قرضوں سے مینوفیکچرنگ، زراعت اور برآمدات جیسے شعبوں کو فروغ ملے گا، پالیسی ریٹ کو کم کرنے سے پیداواری لاگت میں کمی آئے گی اور کاروبار میں جدت لانے میں مدد ملے گا۔