بجلی کی قیمت کے متعلق قیاس آرائیاں،کے۔الیکٹرک وفاقی حکومت اور نیپرا کے تعین کردہ نرخ کی پابندہے ،ترجمان کے الیکٹرک

بدھ 30 جولائی 2025 22:00

کراچی(اُردو پوائنٹ اخبارتازہ ترین - این این آئی۔ 30 جولائی2025ء)کی-الیکٹرک کے صارفین کے لیے بجلی کے نرخوں میں ممکنہ اضافے سے متعلق قیاس آرائیوں سے متعلق ایک مختصر وضاحتی بیان جاری۔ ترجمان کے۔الیکٹرک نے کہا کہ ملک میں صارفین کے لیے بجلی کے نرخ بشمول فی یونٹ قیمت، صارف کیٹیگریز اور استعمال کی بنیاد پر سلیبز ،وزارت توانائی (پاور ڈویژن)کے تحت یونیفارم ٹیرف پالیسی کے مطابق لاگو کئے جاتے ہیں۔

(جاری ہے)

پورے ملک میں لاگو ہونے والے ان نرخوں کا تعین کی-الیکٹرک کے دائرے اختیار میں نہیں ہے ۔ کی-الیکٹرک کو ان نرخوں میں کسی بھی قسم کی ردوبدل کا اختیار حاصل نہیں ہے۔ بجلی کی قیمتوں، سلیبز یا کیٹیگریز میں کسی بھی قسم کی تبدیلی صرف حکومتِ پاکستان کے باقاعدہ نوٹیفکیشن کے ذریعے ہی ممکن ہوتی ہے۔ اس وقت جو صارفین کے لیے بجلی کا ٹیرف نافذ العمل ہے، وہ رواں سال جولائی میں حکومتِ پاکستان کی جانب سے تمام ڈسکوز کے لیے نوٹیفائی کیا گیا تھا اور یہ ملک بھر میں یکساں طور پر نافذ ہے۔