وفاقی وزیر پروفیسر احسن اقبال کی فورتھ آپٹیکل سیٹلائٹ کی کامیاب لانچنگ پر قوم کو مبارکباد

جمعرات 31 جولائی 2025 12:00

اسلام آباد (اُردو پوائنٹ اخبارتازہ ترین - اے پی پی۔ 31 جولائی2025ء) وفاقی وزیر برائے منصوبہ بندی، ترقی و اصلاحات و خصوصی اقدامات پروفیسر احسن اقبال نے فورتھ آپٹیکل ریموٹ سینسنگ سیٹلائٹ کی کامیاب لانچنگ پر پوری قوم کو دلی مبارکباد پیش کرتے ہوئے کہا ہےکہ میں اہلِ وطن اور پوری پاکستانی قوم کو دل کی گہرائیوں سے مبارکباد دینا چاہتا ہوں کہ آج، الحمدللہ، پاکستان کا فورتھ آپٹیکل سیٹلائٹ چین میں کامیابی سے لانچ ہوا اور بحفاظت اپنے مدار میں پہنچ گیا ہے، یہ کامیابی پاکستان کے خلائی پروگرام کی تاریخ میں ایک اور سنگِ میل ہے۔

انہوں نے کہا کہ ہمارا وژن ہے کہ پاکستان کو دوبارہ اسپیس ٹیکنالوجی کے شعبے میں ایک قائدانہ کردار ادا کرنے والے ممالک کی صف میں شامل کریں، ان شاءاللہ، آئندہ برس پاکستان کا پہلا خلاباز چین کے تعاون سے خلا میں جائے گا اور خلائی اسٹیشن پر قدم رکھے گا، ہمارا ہدف ہے کہ 2035 تک پاکستان چاند پر مشن کامیابی سے مکمل کرے۔

(جاری ہے)

وفاقی وزیر نے سیٹلائٹ مشن کی کامیاب تکمیل پر سپارکو کی ٹیم، انجینئرز اور سائنسدانوں کو بھی بھرپور خراجِ تحسین پیش کیا جنہوں نے شب و روز محنت سے اس قومی مشن کو کامیاب بنایا۔

پروفیسر احسن اقبال نے چین کے دیرینہ تعاون پر خصوصی شکریہ ادا کرتے ہوئے کہاکہ ہم اپنے آہنی بھائی چین کے بے مثال تعاون پر تہہ دل سے شکر گزار ہیں، جو ہر قدم اور ہر شعبے میں پاکستان کے ترقیاتی سفر میں ہمارے ساتھ شانہ بشانہ کھڑا ہے۔