تعلیمی اداروں میں سفارشی کلچر کا خاتمہ اور میرٹ میری اولین ترجیح ہے‘ سردار سلیم حیدر

ہفتہ 2 اگست 2025 22:01

لاہور (اُردو پوائنٹ اخبارتازہ ترین - این این آئی۔ 02 اگست2025ء) گورنر پنجاب سردار سلیم حیدر خان نے کہا ہے کہ تعلیمی اداروں میں سفارشی کلچر کا خاتمہ اور میرٹ میری اولین ترجیح ہے،چانسلر آفس تعلیمی اداروں کی تعمیر اور مثبت سرگرمیوں کے لئے دن رات کھلا ہے،ویمن یونیورسٹیوں میں ہراسمنٹ کسی صورت برداشت نہیں کروںگا۔ان خیالات کا اظہار اُنہوں نے دورہ بہاولپور کے دوران گورنمنٹ صادق کالج ویمن یونیورسٹی میں نوتعمیر ارفع کریم اکیڈمک بلاک کا افتتاح،اسلامیہ یونیورسٹی بہاولپور کے سو سال مکمل ہونے پر تقریب میں شرکت اور صادق پبلک سکول کے بورڈ آف گورنرز کے اجلاس کی صدارت کے دوران گفتگو کرتے ہوئے کیا۔

گورنر سردار سلیم حیدر خان نے کہا کہ ارفع کریم اکیڈمک بلاک کا افتتاح میرے لئے فخر کی بات ہے۔

(جاری ہے)

اُنہوں نے کہا کہ ارفع کریم نے چھوٹی سی عمر میں آئی ٹی کے شعبہ میں پاکستان کانام روشن کیا۔ گورنر پنجاب نے کہا کہ موجود دور تشکیل علم،سائنس و ٹیکنالوجی اور ڈیجیٹل ترقی کا ہے۔اُنہوں نے کہا کہ یہ بڑی خوشی کی بات ہے کہ طلباو طالبات یونیورسٹیوں کی تدریسی ،تحقیقی اور مثبت سرگرمیوں میں بڑھ چڑھ حصہ لے رہے ہیں۔

گورنر پنجاب نے کہا کہ صادق پبلک سکول جیسے تاریخی تعلیمی ادارے پاکستان کا چہرہ ہیں اور ان جیسے تعلیمی درسگاہوں سے فارغ التحصیل طلبہ ملکی ترقی میں اہم کردار ادا کر رہے ہیں۔اُنہوںنے کہا کہ جنوبی پنجاب کے تعلیمی ادارے وطن عزیز کی سماجی،معاشی اور تعلیمی ترقی میں اہم کردار ادا کر رہے ہیں۔گورنر پنجاب نے کہا کہ چانسلر آفس تعلیمی اداروں کی تعمیر اور مثبت سرگرمیوں کے لئے دن رات کھلا ہے۔

اُنہوں نے مزید کہا کہ تعلیمی اداروں میں سفارشی کلچر کا خاتمہ اور میرٹ میری اولین ترجیح ہے۔گورنر پنجاب نے کہا کہ خواتین کی یونیورسٹیوں میں ہراسمنٹ کسی صورت برداشت نہیں کروں گا۔ اُنہوں نے کہا کہ اگر میرے پاس کسی خاتون کی طرف سے ہراسانی کا کیس آیا تو نوکری سے فارغ کرنے کے ساتھ ساتھ قانون کے مطابق سزا بھی ہو گی۔گورنر پنجاب نے کہا کہ تعلیمی اداروں میں منشیات اور بدمعاشی کلچر کے خلاف زیرو ٹالرنس اختیار کی ہوئی ہے۔