انصاف کی فراہمی کیلئے بنچ اور بار کے تعلقات میں مزید بہتری لائی جائیگی‘ نو منتخب وائس چیئرمین پنجاب بار

وکلاء کے بہتری کیلئے جاری منصوبوں کو برق رفتاری سے آگے بڑھایا جائے گا‘ اشفاق احمد کہوٹ کی وکلاء کے وفود سے گفتگو

اتوار 3 اگست 2025 16:10

لاہور(اُردو پوائنٹ اخبارتازہ ترین - این این آئی۔ 03 اگست2025ء)پنجاب بار کونسل کے نو منتخب وائس چیئرمین چودھری محمد اشفاق احمد کہو ٹ نے کہا ہے کہ انصاف کی فراہمی میں وکلاء کے کردار سے کوئی انکار نہیں کر سکتا ، خدمت کی روایت کو جاری رکھیں گے جس کے تحت وکلاء کی فلاح و بہبود میں کوئی کسراٹھا نہیں رکھی جائے گی ، وکلاء کے بہتری کیلئے جاری منصوبوں کو برق رفتاری سے آگے بڑھایا جائے گا۔

ان خیالات کا اظہار انہوں نے مبارکباد دینے آنے والے وکلاء کے وفود سے گفتگو کرتے ہوئے کیا ۔ اس موقع پر چیئرمین ایگزیکٹو کمیٹی ذبیع اللہ ناگرہ ،پنجاب بار کونسل کے سابق وائس چیئرمینز فرحان شہزاد،چودھری بابر وحید،سیکرٹری پنجاب بار کونسل رفاقت علی سوہل،اکائونٹس آفیسر رانامحمد عمیر اور دیگر بھی موجود تھے۔

(جاری ہے)

وائس چیئرمین پنجاب بار چودھری محمد اشفاق احمد کہوٹ نے کہا کہ قیادت کی مشاورت سے آگے بڑھیں گے ، انصاف کی فراہمی کے لئے بنچ اور بار کے تعلقات میں مزید بہتری لائی جائے گی ،ہر ضلع و تحصیل بار اور وکلا ء کی آواز بنیں گے ،ان کے کندھے سے کندھا ملا کر چلیں گے۔

انہوں نے کہا کہ وکالت ایک معتبر پیشہ ہے ، وکلاء کو پروفیشنل انداز میں اپنا آپ منوانا ہے ، دلیل کو فروغ دینا ہے ۔ انہوںنے کہا کہ وکلاء کا جمہوریت کی بحالی اور اس کی مضبوطی میں بھی کلیدی کردار ہے اور ان شااللہ اپنا یہ کردار نبھاتے رہیں گے۔ملاقات کے لئے آنے والے وفود نے چوہدری محمد اشفاق احمد کہوٹ کو وائس چیئرمین اور ذبیع اللہ ناگرہ کو چیئرمین ایگزیکٹو بار کونسل منتخب ہونے پر مبارکباد پیش کی ۔