فیصل میں جشن آزادی کی تیاریاں جاری، جگہ جگہ قومی پرچموں، جھنڈیوں، سٹکرز، بیجز کے سٹالز سج گئے

اتوار 3 اگست 2025 17:20

فیصل آباد (اُردو پوائنٹ اخبارتازہ ترین - اے پی پی۔ 03 اگست2025ء) فیصل آباد ڈویژن میں 14اگست کو جشن آزادی کی آمد کی مناسبت سے جگہ جگہ قومی پرچموں، جھنڈیوں، سٹکرز، بیجز، ٹی شرٹس اور اسی نوعیت کے دیگر سامان کے سٹالز سجناشروع ہو گئے جہاں بڑی تعداد میں جشن آزادی سے متعلقہ انتہائی خوبصورت، دلکش، دیدہ زیب، آرائشی ساما ن فروخت کیلئے رکھا گیا ہے جس میں بچے،بوڑھے اور جوان بھر پور دلچسپی لے رہے ہیں ۔

دوسری جانب ضلعی انتظامیہ اور تمام اہم سیاسی جماعتوں نے بھی جشن آزادی کی تقریبات پروقار طریقے سے منانے کا اعلان کیا ہے اور کہا ہے کہ حکومتی ہدایات کے مطابق اس سال یوم آزادی کو قومی جوش و جذبے، اتحاد اور ایک نئی ولولہ انگیز سوچ کے ساتھ ”معرکہ حق“ کے عنوان سے منایا جائے گا تاکہ عوام کے عزم، یکجہتی اور روشن مستقبل کی امید کو بھرپور انداز میں خراج تحسین پیش کیا جا سکے۔

(جاری ہے)

انہوں نے کہا کہ جشن آزادی کی یہ تقریبات دنیا کو یہ پیغام دیں گی کہ پاکستانی ایک خوددار، مضبوط اور پرعزم قوم ہیں جو اپنی خودمختاری پر کوئی سمجھوتہ نہیں کرینگے۔ہماری افواج، عوام، حکومت اور تمام ادارے وطن عزیز کی ترقی اورخوشحالی کیلئے متحد ہیں۔ مذکورہ جماعتوں کے قائدین نے عوام الناس سے اپیل کی ہے کہ وہ جشن آزادی کے موقع پر بے جا ا صراف سے گریز کریں اور اپنی رقوم عطیات غریب، نادار، بے سہارا، یتیموں، مسکینوں، بیوگان اور مستحق افراد کو فراہم کریں تاکہ وہ بھی جشن آزادی کی خوشیوں میں بڑھ چڑھ کر حصہ لے سکیں۔