پی آئی اے کی برطانیہ کے لیے فلائٹ آپریشن کی تیاریاں تیز

پی آئی اے نے مانچسٹر میں کپتانوں، انجینئرز اور فضائی میزبانوں کی رہائش کے لیے انتظامات شروع کر دیے

جمعرات 2 اکتوبر 2025 14:18

پی آئی اے کی برطانیہ کے لیے فلائٹ آپریشن کی تیاریاں تیز

کراچی(اُردو پوائنٹ اخبارتازہ ترین - این این آئی۔ 02 اکتوبر2025ء) پاکستان سے برطانیہ جانے والوں کے لئے اہم خبر آگئی ، پی آئی اے نے برطانیہ کے لیے فلائٹ آپریشن کی تیاریاں تیز کردیں۔تفصیلات کے مطابق قومی ایئرلائن نے برطانیہ کے لیے فلائٹ آپریشن شروع کرنے کی منصوبہ بندی تیز کردی ہے۔پی آئی اے نے مانچسٹر میں کپتانوں، انجینئرز اور فضائی میزبانوں کی رہائش کے لیے انتظامات شروع کر دیے ہیں۔

ترجمان نے بتایا کہ عملے کے لیے مانچسٹر میں ہوٹل سروسز فراہم کرنے کی درخواستیں 3 نومبر تک جمع کرائی جا سکتی ہیں۔

(جاری ہے)

یہ درخواستیں پی آئی اے شعبہ سپلائی چین کے جی ایم پروکیورمنٹ کو ارسال کی جائیں گی۔واضح رہے کہ گزشتہ ہفتے قومی ایئرلائن کو برطانیہ کے لیے فلائٹ آپریشن کی اجازت ملی تھی، جس کے بعد فوری طور پر انتظامات شروع کر دیے ہیں۔خیال رہے قومی ایئرلائن آئندہ ماہ برطانیہ کیلئے براہ راست فضائی آپریشن کا آغاز کرے گی ، ابتدائی مرحلے میں مانچسٹر کیلئے پروازیں چلائی جائیں گی ، بعد ازاں لندن اور برمنگھم کے لیے بھی سروس فراہم کی جائے گی۔

قومی ایئرلائن کو پانچ سال کے لیے سیکیورٹی اور کارگو سرٹیفکیٹ جاری کیے گئے ہیں، جس کے تحت قومی ایئرلائن مسافروں اور کارگو دونوں کے لیے پروازیں آپریٹ کرسکے گی۔