پی ایچ اے کا پارکس میں تمباکونوشی کرنیوالوں کیخلاف سخت کارروائی کا فیصلہ

اتوار 3 اگست 2025 17:20

لاہور (اُردو پوائنٹ اخبارتازہ ترین - اے پی پی۔ 03 اگست2025ء) وزیراعلی پنجاب مریم نواز کے ویژن اور محکمہ ہائوسنگ کی ہدایات کی روشنی میں پارکس اینڈ ہارٹیکلچر اتھارٹی لاہور نے شہر کے تمام عوامی پارکس کو مکمل طور پر نو سموکنگ زون قرار دیا ہے اور اس فیصلے پر موثر عملدرآمد کا آغاز کر دیا گیا ہے۔

(جاری ہے)

اتوار کو ترجمان کے مطابق ڈی جی پی ایچ اے منصور احمد کی ہدایت پر لاہور کے پارکس کے داخلی و خارجی راستوں سمیت اندرونی مقامات پر "نو سموکنگ" کے واضح سائن بورڈز نصب کیئے جا رہے ہیں تاکہ شہریوں کو تمباکو نوشی سے متعلق آگاہی فراہم کی جا سکے،محکمہ ہا ئوسنگ کی جانب سے چند روز قبل صوبہ بھر کے پارکس کو نو سموکنگ زون قرار دینے کا اعلان کیا گیا تھا جس پر اب عملدرآمد شروع کر دیا گیا ہے۔

ڈی جی پی ایچ اے منصور احمد کا کہنا ہے کہ پارکس میں تمباکونوشی کرنا تمباکونوشی آرڈیننس 2002 کے تحت قابل سزا جرم ہے، خلاف ورزی کی صورت میں متعلقہ فرد کو موقع پر ہی پولیس کے حوالے کر کے قانونی کارروائی عمل میں لائی جائے گی۔ ڈی جی پی ایچ اے نے شہریوں سے اپیل کی ہے کہ وہ پارکس میں تمباکونوشی سے اجتناب اور صاف، صحت مند و خوشگوار ماحول قائم رکھنے کے لیے پی ایچ اے سے تعاون کریں۔