دو دریا پر بچوں کے ساتھ خود کشی کرنے والے شخص کی آخری آڈیواوربچوں کیساتھ سمندر میں ڈوبنے کی دل دہلانے والی ویڈیوسامنے آگئی

کراچی(اُردو پوائنٹ اخبارتازہ ترین - این این آئی۔ 04 اگست2025ء)کراچی میں دو دریا پر بچوں کے ساتھ خود کشی کرنے والے شخص کی آخری آڈیو کال اوربچوں کیساتھ سمندر میں ڈوبنے کی دل دہلانے والی ویڈیوسامنے آگئی ہے ۔تفصیلات کے مطابق کراچی کے تفریحی مقام دو دریا پر بچوں کے ساتھ خودکشی کرنے والے شخص کی آخری آڈیو کال منظر عام پر آگئی۔آخری گفتگو میں اورنگزیب نامی شخص نے اپنی اہلیہ پر بے وفائی اور خاندان پر دھوکے کا الزام لگایا، اورنگزیب نے مبینہ آخری کال اپنے کوچنگ کی ملازمہ سے کی۔

مبینہ آڈیو ریکارڈنگ میں اورنگزیب نے کہا کہ ماہرہ کو طلاق دے دی ہے، مجھے اپنوں نے دھوکا دیا، وقت کم ہے، بچوں کو ڈبونے کے بعد خود کود جائوں گا۔آڈیو کال کے دوران اورنگزیب نے کوچنگ سینٹر کی ملازمہ سے سوال کیا کہ ماہرہ کب سے باسط سے مل رہی ہی آڈیو کال میں انکشاف ہوا کہ ماہرہ روز باسط سے ملتی رہی، گیٹ لاک کر کے اکیلے میں ملاقاتیں ہوئیں۔

(جاری ہے)

اورنگزیب نے کہا کہ میں نے اس لڑکے کو بھی بہت مارا ہے، 1400 ثبوت میرے پاس ہیں، ماہرہ نے میرے ساتھ بے وفائی کی، ماہرہ کے اہلخانہ بھی اس میں ملوث ہیں۔آڈیو میں انکشاف ہوا کہ ماہرہ کو موبائل باسط نے دیا تھا، میرے ساتھ اپنوں اور سسرال والوں نے دھوکا کیا۔دوسری جانب باپ کی بچوں کیساتھ سمندر میں ڈوبنے کی دل دہلانے والی ویڈیو بھی سامنے آگئی ہے۔

ویڈیو میں باپ کو بچوں سمیت سمندر میں ڈوبتے اور شہریوں کو ویڈیو بناتے دیکھا جاسکتا ہے۔ فوٹیج میں دیکھا جا سکتا ہے کہ تینوں افراد سمندر کے کنارے سے صرف چند گز کے فاصلے پر تھے جب وہ پانی میں ڈوب گئے، وہاں پر موجود لوگوں نے فوری طور پر انہیں بچانے کی بھرپور کوشش کی تاہم بدقسمتی سے کوئی کامیابی حاصل نہ ہو سکی۔واقعہ کے فوری بعد کی یہ ویڈیو ظاہر کرتی ہے کہ خطرناک لہروں اور سمندر کی بے رحمی نے چند لمحوں میں تین زندگیاں نگل لیں۔

ریسکیو اداروں نے موقع پر پہنچ کر کارروائی کا آغاز کیا جبکہ واقعے نے اہلِ علاقہ اور سیر و تفریح کے لیے آئے افراد کو شدید صدمے سے دوچار کر دیا ہے۔واضح رہے کہ 4 روز قبل ایک شخص نے اپنی کمسن بیٹی اور بیٹے کے ساتھ سمندر میں چھلانگ لگا دی تھی، باپ اور اس کے دونوں بچوں کی لاشیں سمندر سے نکال لی گئی تھیں۔