جعلی مقابلے میں ہلاکت، شہری کی درخواست پر معاملہ ایف آئی اے کے سپرد

پیر 4 اگست 2025 16:57

لاہور (اُردو پوائنٹ اخبارتازہ ترین - این این آئی۔ 04 اگست2025ء) لاہور ہائیکورٹ نے عارف والا کے شہری کی مبینہ جعلی پولیس مقابلے میں ہلاکت کے خلاف درخواست دادرسی کے لیے ڈائریکٹر ایف آئی اے کو بھجوا دی۔چیف جسٹس لاہور ہائیکورٹ عالیہ نیلم نے کوثر پروین کی درخواست نمٹانے کا تحریری حکم جاری کردیا، ڈائریکٹر ایف آئی اے کو درخواست پر قانون کے مطابق فیصلہ کرنے کی ہدایت کی گئی۔

(جاری ہے)

درخواست گزار نے موقف اپنایا کہ اس کے پانچ بیٹوں کو عارف والا پولیس نے اٹھایا، تین بیٹوں کو جوڈیشل ریمانڈ پر جیل بھیج دیا گیا، دو بیٹوں عمر دراز اور کم سن دلدار کو وہاڑی پولیس کے حوالے کر دیا گیا، جس پرگرفتاریوں کے خلاف عدالت سے رجوع کیا۔درخواست گزار نے مزید بتایا کہ عدالت کو ایس ایچ او حسن نے یقین دہانی کرائی کہ کسی کو جعلی پولیس مقابلے میں نہیں مارا جائے گا، عدالت میں کرائی گئی یقین دہانی کے باوجود عمر دراز کو جعلی پولیس مقابلے میں مار دیا گیا۔شہری نے استدعا کی کہ عدلت اس ہلاکت پر ذمہ دار پولیس کے خلاف ٹارچر اینڈ کسٹوڈیل ڈیٹھ ایکٹ 2022ء کے تحت مقدمات درج کرنے کا حکم دے اور ایف آئی اے کو معاملہ کی تحقیقات کا حکم دے۔