وہ قوم ہمیشہ سرخرو ہوتی ہے جو اپنے شہداء کی تکریم کرتی ہے، وزیرداخلہ

پیر 4 اگست 2025 20:18

اسلام آباد(اُردو پوائنٹ اخبارتازہ ترین - این این آئی۔ 04 اگست2025ء)وفاقی وزیر داخلہ محسن نقوی نے کہا ہے کہ یوم شہدائے پولیس پر پولیس کے تمام شہداء کو خراج عقیدت پیش کرتا ہوں،4اگست کا دن ملک کی داخلی سلامتی کے نگہبانوں کے نام ہے، جنہوں نے اپنی قیمتی جانیں قربان کرکے ریاستی عملداری کو یقینی بنایا۔ وفاقی وزیرداخلہ محسن نقوی نے یوم شہدائے پولیس کے موقع پر خصوصی پیغام میں کہا کہ ان عظیم محافظوں کو سلام جو شہادت کے بلند مرتبے پر فائز ہو کر امر ہو گئے۔

دہشتگردی،جرائم اور سماج دشمن عناصر کیخلاف بہادری سے لڑتے ہوئے جانیں نچھاور کرنے والے پولیس افسر و جوان قوم کے ہیرو ہیں،پولیس شہداء نے فرض نبھاتے ہوئے اپنی زندگیاں قربان کر کے تاریخ میں اپنا مقام امر کیا،ریاست ان عظیم خاندانوں کی مقروض ہے جن کے بیٹوں نے امن و تحفظ کے لیے اپنی جانیں قربان کیں۔

(جاری ہے)

شہید ایس ایس پی اشرف مارتھ، شہید۔ کیپٹن مبین اور تمام پولیس شہداء ہمارے دلوں میں ہمیشہ زندہ ہیں اور زندہ رہیں گے،ہم ہر لمحہ پولیس شہداء کے اہل خانہ کے ساتھ ہیں اور ساتھ رہیں گے۔

وزیر داخلہ محسن نقوی نے کہا کہ وہ قوم ہمیشہ سرخرو ہوتی ہے جو اپنے شہداء کی تکریم کرتی ہے،آج ہم اپنے ضمیر کے سامنے عہد کرتے ہیں کہ نہ ہم پولیس شہداء کو بھولیں گے اور نہ اٴْن کے خاندانوں کو تنہا چھوڑیں گے۔