بحریہ ٹائون کی پراپرٹیز کی نیلامی کے خلاف درخواستوں پر فیصلہ محفوظ

پیر 4 اگست 2025 21:20

اسلام آباد (اُردو پوائنٹ اخبارتازہ ترین - اے پی پی۔ 04 اگست2025ء) اسلام آباد ہائیکورٹ کے چیف جسٹس سردار محمد سرفراز ڈوگر اور جسٹس محمد آصف پر مشتمل ڈویژن بنچ نے بحریہ ٹائون کی پراپرٹیز کی نیلامی کے خلاف درخواستوں پر فیصلہ محفوظ کر لیا۔گذشتہ روزسماعت کے دوران نیب پراسیکیوٹر رافع مقصود، بحریہ ٹائون کی جانب سے سینئر قانون دان فاروق ایچ نائیک اور دیگر عدالت پیش ہوئے۔

فاروق ایچ نائیک نے کہاکہ بحریہ ٹائون نے نیلامی اشتہار کے خلاف ایک نئی درخواست دائر کی ہے،زین ملک نے نیب کے ساتھ پلی بارگین کی تھی،بحریہ ٹائون کی پراپرٹیز زین ملک کی ضمانت کے طور پر رکھی گئیں،زین ملک نے پلی بارگین منسوخ کرنے کی درخواست دی جو ابھی زیرالتواء ہے،زین ملک کی قسطیں نہ دینے پر نیب نے پلی بارگین ختم کرنے کا نوٹس دیا،بحریہ ٹائون کی جائیدادوں کی نیلامی کا نوٹس غیرقانونی اور بدنیتی پر مبنی ہے،نیب نے پہلے کہا کہ ہم نیلامی کرنا ہی نہیں چاہتے جو کہ جھوٹ تھا،بعد میں نیلامی کا جو نوٹس جاری کیا وہ غیرقانونی تھا،پلی بارگین منسوخ ہونے پر نیب کے پاس زین ملک کو گرفتار کرنے کا اختیار ہے،نیب زین ملک کو گرفتار کر سکتا ہے کیس میں دوبارہ ملزم بنایا جا سکتا ہے،بحریہ ٹائون اشتہاری ملزم ہی نہیں ہے تو پھر پراپرٹیز کیسے اٹیچ ہو سکتی ہیں،بحریہ ٹائون کے خلاف تو نیب کارروائی کر ہی نہیں سکتا تھا۔

(جاری ہے)

نیب پراسیکیوٹر رافع مقصود نے کہاکہ بحریہ ٹائون نے ضمانت دی، جب ملزم اشتہاری ہے تو ضامن کے خلاف کارروائی ہو گی،بحریہ ٹائون کی یہ درخواست قابل سماعت ہی نہیں ہے۔ فریقین کے دلائل مکمل ہونے پر عدالت نے فیصلہ محفوظ کر لیا۔