قومی اسمبلی اجلاس، پی ٹی آئی نے ارکان اسمبلی کی سزائوں کو سیاسی قتل قرار دے دیا

پیر 4 اگست 2025 21:30

اسلام آباد (اُردو پوائنٹ اخبارتازہ ترین - این این آئی۔ 04 اگست2025ء)قومی اسمبلی اجلاس میں حکومت ،اپوزیشن ایک بار پھر آمنے سامنے آگئے، پی ٹی آئی ارکان نے سزایافتہ ارکان کی تصاویر ایوان میں لاکر رکھ دیں اور وقتا فوقتا نعرے بازی کرتے رہے، پی ٹی آئی نے اراکین اسمبلی کی سزائوں کو سیاسی قتل قرار دے دیا۔

(جاری ہے)

پیر کو قومی اسمبلی کا اجلاس سپیکر سردار ایاز صادق کی زیر صدارت ہوا جس میں پی ٹی آئی اراکین عمر ایوب، صاحبزادہ حامد رضا، عبدالطیف، جمشید دستی، احمد چٹھہ، رائے حسن نواز اور زرتاج گل کی تصاویر ایوان میں لے کر آئے، نو منتخب رکن اسمبلی نے ارم حامد حمید نے اسمبلی رکنیت کا حلف اٹھایا تو پی ٹی آئی ارکان نے احتجاج اور نعرے بازی کی، اجلاس میں میاں اظہر کے لئے دعا کرائی گئی۔

ملک عامر ڈوگرنے کہا کہ ہمارے اراکین کا سیاسی قتل کیا گیا اس پر بھی ایوان میں فاتحہ پڑھائی جائے، احتجاج کے طور پر ہم یہاں کھڑے ہوئے ہیں، ہمارے حوصلے بلند ہیں ہم ڈٹے ہوئے ہیں، ہم ظلم کے خلاف کھڑے ہیں خاموش نہیں ہیں۔وزیر اطلاعات نے پی ٹی آئی ارکان پر تنقید کرتے ہوئے کہا کہ 9مئی کو آپ نے شہدا کی یادگاروں کو مسمار کیا، وزیر اطلاعات کی تقریر کے دوران اپوزیشن نے شور شرابہ کیا، عطا اللہ تارڑ نے کہا کہ9 مئی کی سزائیں قانون کے مطابق ہوئی ہیں۔