امریکی ایٹمی آبدوزوں کی تعیناتی پر روس کی وارننگ

ہم سمجھتے ہیں کہ ہر کسی کو جوہری بیانات کے حوالے سے بہت زیادہ محتاط رہنا چاہیے،کریملن

منگل 5 اگست 2025 17:33

امریکی ایٹمی آبدوزوں کی تعیناتی پر روس کی وارننگ

ماسکو(اُردو پوائنٹ اخبارتازہ ترین - این این آئی۔ 05 اگست2025ء) روس نے امریکا کے صدر ڈونلڈ ٹرمپ کی جانب سے جوہری آبدوزیں تعینات کرنے کے اعلان پر خبردار کیا ہے کہ جوہری معاملات پر بیان بازی میں انتہائی احتیاط کی ضرورت ہے۔روسی صدارتی محل کریملن کے ترجمان دمتری پیسکوف نے کہاکہ روس جوہری عدم پھیلائو کے معاملے کو بہت سنجیدگی سے لیتا ہے، اور ہم سمجھتے ہیں کہ ہر کسی کو جوہری بیانات کے حوالے سے بہت زیادہ محتاط رہنا چاہیے۔

(جاری ہے)

یہ بیان اس وقت آیا جب صدر ٹرمپ نے سابق روسی صدر دمتری مدویدیف کے مبینہ اشتعال انگیز تبصرے کے جواب میں دو جوہری آبدوزیں تعینات کرنے کا اعلان کیا۔مدویدیف نے کہاکہ ہر نیا الٹی میٹم ایک خطرہ ہے اور جنگ کی طرف ایک قدم ہے نہ صرف روس اور یوکرین کے درمیان، بلکہ امریکہ کے خلاف بھی۔مدویدیف، جو اس وقت روسی سلامتی کونسل کے نائب چیئرمین ہیں، 2008 سے 2012 تک روس کے صدر رہے، جب کہ ولادیمیر پیوٹن نے آئینی پابندیوں سے بچنے کے لیے انہیں بطور "عارضی صدر" استعمال کیا۔