محکمہ ایکسائز، ٹیکسیشن و انسداد منشیات نے پاک بحریہ کے ساتھ مشترکہ آپریشن میں منشیات کی اسمگلنگ کی کوشش کو ناکام بنا دیا،24 ارب روپے مالیت کی منشیات برآمد

کوئٹہ (اُردو پوائنٹ اخبارتازہ ترین - اے پی پی۔ 06 اگست2025ء) محکمہ ایکسائز، ٹیکسیشن و انسداد منشیات (ساؤتھ زون) نے ڈائریکٹر جنرل محمد زمان کی قیادت میں ایک شاندار اور تاریخی کارروائی کے دوران پاک بحریہ کے ساتھ مشترکہ آپریشن میں 24 ارب روپے سے زائد مالیت کی منشیات اور شراب کی اسمگلنگ کی کوشش کو ناکام بنا دیا۔ڈی جی پی آر کی پریس ریلیز کے مطابق یہ حساس اور کامیاب کارروائی جوائنٹ میری ٹائم انفارمیشن کوآرڈینیشن سینٹر (JMICC) کی مؤثر معاونت سے عمل میں لائی گئی، جس کے دوران بین الاقوامی پانیوں سے اسمگلنگ کے ذریعے لایا گیا منشیات کا ایک بڑا ذخیرہ، جو کہ کُنڈ ملیر کے ساحلی علاقے میں چھپایا گیا تھا، کو قبضے میں لے لیا گیا۔

ضبط شدہ اشیاء میں 8000 بوتل غیر ملکی شراب اور بیئر،600 کلو گرام اعلیٰ کوالٹی کی چرس،200 کلو گرام آئس میتھ ایمفیٹامائن شامل ہے، ان ضبط شدہ منشیات کی بین الاقوامی منڈی میں مالیت تقریباً 24.28 ارب روپے کے لگ بھگ ہے، جو حالیہ برسوں میں کسی بھی قانون نافذ کرنے والے ادارے کی سب سے بڑی کامیابیوں میں سے ایک ہے اور محض ایک ماہ کے اندر ساؤتھ زون کی یہ دوسری بڑی کامیابی ہے۔

(جاری ہے)

ڈی جی محمد زمان کی قیادت میں غیر معمولی کامیابیاں جاری ہیں اس تاریخی آپریشن سے پہلے بھی، گزشتہ ماہ ڈائریکٹر جنرل محمد زمان کی نگرانی میں ساؤتھ زون کی ٹیم نے غیر ملکی شراب اور منشیات کی بڑی مقدار ضبط کی، جس سے ان کی پیشہ ورانہ قابلیت، قیادت اور انسدادِ منشیات کے عزم کا واضح اظہار ہوتا ہے۔ان کی قیادت میں ساؤتھ زون ایک مضبوط، چاق و چوبند اور حکمت عملی سے لیس فورس کے طور پر ابھر کر سامنے آیا ہے، جو کہ نہ صرف اسمگلنگ کے نیٹ ورکس کو بے نقاب کر رہا ہے بلکہ پاکستانی نوجوانوں کو منشیات کے ناسور سے بچانے میں بھی اہم کردار ادا کر رہا ہے۔

پریس ریلیز میں واضح پیغام دیا گیا ہےکہ یہ آپریشن بین الاقوامی منشیات فروشوں اور اسمگلروں کے لیے ایک سخت پیغام ہے کہ پاکستان کی زمینی اور سمندری سرحدیں ہمیشہ چوکس، محفوظ اور قانون نافذ کرنے والے اداروں کے فولادی عزم کے ساتھ محفوظ ہیں۔محکمہ ایکسائز، ٹیکسیشن و انسداد منشیات (ساؤتھ زون) اس عزم کا اعادہ کرتا ہے کہ وہ بلوچستان کی بین الاقوامی سرحدوں اور پاکستان کے قومی بارڈرز پر ہمیشہ چوکنا اور متحرک رہے گا اور بین الادارہ جاتی تعاون اور عوامی اعتماد کے ساتھ ملک کو منشیات سے پاک بنانے کے مشن پر گامزن رہے گا۔