اے این ایف کی مختلف شہروں میں منشیات سمگلنگ کے خلاف کارروائیاں ، 8 ملزمان گرفتار

بدھ 6 اگست 2025 16:17

اسلام آباد (اُردو پوائنٹ اخبارتازہ ترین - اے پی پی۔ 06 اگست2025ء) اینٹی نارکوٹکس فورس (اے این ایف)نے ملک کے مختلف شہروں میں منشیات سمگلنگ کے خلاف کارروائیوں کے دوران 64 لاکھ روپے سے زائد مالیت کی 44 کلو منشیات برآمد کرکے 2 خواتین سمیت 8 ملزمان کو گرفتار کر لیا۔بدھ کوترجمان اے این ایف کی جانب سے جاری بیان کے مطابق فیصل آباد ایئرپورٹ پر بحرین جانے والے مسافر کے پیٹ سے 479 گرام وزنی آئس بھرے کیپسولز برآمد کرکے ملزم کو گرفتار کر لیا۔

(جاری ہے)

سنگجانی ٹول پلازہ اسلام آباد کے قریب گاڑی سے 16.8 کلو چرس برآمد کرکے ملزم کو گرفتار کر لیا۔اسلام آباد موٹروے ٹول پلازہ کے قریب بس میں سوار 2 خواتین سمیت 3 ملزمان سے 12 کلو چرس برآمد کرلی۔ گولڑہ موڑ اسلام آباد کے قریب رکشہ سے 10.5 کلو آئس برآمد کرکے ملزم کو گرفتار کرلیا گیا۔شیر شاہ ٹول پلازہ ملتان کے قریب گاڑی سے 5 کلو آئس برآمد کرکے 2 ملزمان کو برآمد کر لیا۔گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔