آسٹریلیا، نیو ساؤتھ ویلز میں 10 لاکھ گھروں کو بجلی فراہم کرنے کی صلاحیت رکھنے والی سپر بیٹری کو باضابطہ طور پر بجلی کے نظام سے منسلک کر دیاگیا

کینبرا (اُردو پوائنٹ اخبارتازہ ترین - اے پی پی۔ 07 اگست2025ء) آسٹریلوی ریاست نیو ساؤتھ ویلز کے 10 لاکھ سے زائد گھروں کو بجلی فراہم کرنے کی صلاحیت رکھنے والی سپر بیٹری’’واراٹا‘‘ کو باضابطہ طور پر بجلی کے نظام سے منسلک کرکے آن کر دیا گیا ہے۔ اردو نیوز نے اے بی سی نیوز کے حوالے سے بتایا کہ اس سپر بیٹری کو نیو ساؤتھ ویلز کے علاقے سینٹرل کوسٹ میں واقع کوئلے سے چلنے والے ایک پرانے بجلی گھر کے ساتھ منسلک کیا گیا ہے۔

رپورٹ کے مطابق یہ بجلی گھر ملک کی 50 فیصد بجلی کی ضروریات پوری کرتا ہے۔ سپر بیٹری کے نظام کا انتظام سنبھالنے والی کمپنی’’اکیشا انرجی‘‘ کے سربراہ نک کارٹر نے کہا کہ یہ بیٹری بجلی کے نظام کے لیے جھٹکا جذب کرنے والے آلے کے طور پر کام کرے گی۔

(جاری ہے)

انہوں نےکہا کہ بیٹری کا اصل کام کسی مسئلے کے پیدا ہوجانے کی صورت میں بجلی کے نظام کو بچانا ہے۔

نک کارٹر کے مطابق بیٹری نے گرمیوں کے دوران پہلے ہی بجلی کے نظام کو سہارا دے کر اپنی افادیت ثابت کی ہے۔ جب ہم بیٹری کو ٹیسٹ کر رہے تھے تو اسی دوران ایک دن درجہ حرارت شدید حد تک بڑھ گیا جس کی وجہ سے نیو ساؤتھ ویلز میں بجلی کی کمی پیدا ہو گئی۔ اس وقت بیٹری سے بجلی فراہم کرنا نظام کو مستحکم رکھنے میں مددگار ثابت ہوا۔ یہ بیٹری فٹبال کے آٹھ میدانوں کے برابر رقبے پر پھیلی ہوئی ہے ،یہ سُپر بیٹری تین ہزار پانچ سو سے زائد کنٹینرز پر مشتمل ہے جن میں بیٹریاں نصب ہیں۔

رپورٹ کے مطابق صارفین کو اس بیٹری سے صرف بجلی کی فراہمی برقرار رکھنے کے علاوہ دیگر کئی فوائد کی بھی امید ہے۔ رپورٹ کے مطابق جب یہ بیٹری اپنی مکمل صلاحیت یعنی 850 میگا واٹ پر کام شروع کرے گی تو ایک گھنٹے میں چار کروڑ 60 لاکھ سمارٹ فونز کو چارج کر سکے گی۔ انرجی کمپنی کے ٹیکنیکل ایڈوائزر اینڈریو کنگز کا کہنا ہے کہ یہ بیٹری نیو ساؤتھ ویلز کے مختلف حصوں سے آنے والی بجلی کو مرکزی نظام میں شامل ہونے کا ایک سستا ذریعہ بنے گی، جس کی وجہ سے بجلی کی قیمتیں کم ہوں گی اور میرا خیال ہے کہ یہ ہم سب کے لئے خوش آئند بات ہے۔

انہوں نے کہا کہ یہ بیٹری کوئلے سے پیدا ہونے والی بجلی کے متبادل کے طور پر اہم کردار ادا کرے گی۔ جب کوئلے سے چلنے والے بجلی گھر بند ہوں گے، تو یہ بیٹری توانائی ذخیرہ کرنے کے ساتھ ساتھ نظام کو مستحکم رکھنے میں مدد دے گی۔ کلین انرجی کونسل کے چیف پالیسی آفیسر انا فریمین نے کہا کہ یہ یک اہم سنگ میل ہے، واراٹا جیسی بڑی بیٹریاں وہ بنیادی ڈھانچہ ہیں جن کی نیو ساؤتھ ویلز کے بجلی کے نظام اور قومی بجلی مارکیٹ کو ضرورت ہے۔

انہوں نے کہا کہ ذرائع سے حاصل کردہ توانائی کو بیٹری جیسے ذخیرہ کرنے والے آلات کے ذریعے محفوظ بنایا جائے تو یہ آسٹریلیا کے توانائی کے نظام کو تبدیل کرنے، بجلی کے نظام کو کاربن سے پاک بنانے اور بجلی کی مسلسل فراہمی یقینی بنانے کا سب سے کم لاگت اور قابل عمل طریقہ ہے۔