ویسٹ انڈین سرزمین پر ہدف کا کامیاب تعاقب، رضوان الیون نے 32 سالہ ملکی ریکارڈ توڑ دیا

پاکستان نے ویسٹ انڈیز کا 281 رنز کا ہدف 49 ویں اوور میں 5 وکٹوں کے نقصان پر با آسانی حاصل کرلیا

ذیشان مہتاب ہفتہ 9 اگست 2025 14:28

ویسٹ انڈین سرزمین پر ہدف کا کامیاب تعاقب، رضوان الیون نے 32 سالہ ملکی ..

ٹرینیڈاڈ (اردو پوائنٹ تازہ ترین اخبار ۔ 9 اگست 2025ء ) پاکستان نے 3 ون ڈے میچز کی سیریز کے پہلے میچ میں میزبان ویسٹ انڈیز کو 5 وکٹوں سے شکست دے کر سیریز میں ایک صفر کی برتری حاصل کرلی۔

یہ پاکستان کی طرف سے ویسٹ انڈیز کی سرزمین پر ون ڈے میں سب سے زیادہ کامیاب رنز کا تعاقب ہے۔

اس سے قبل پاکستان نے 1993ء میں ویسٹ انڈیز میں 260 رنز کا ہدف 3 وکٹوں پر پورا کیا تھا، 2013ء میں پاکستان نے 6 وکٹوں پر 243 رنز بنا کر ہدف کا کامیاب تعاقب کیا تھا، 2017ء میں پاکستان نے 4 وکٹوں پر 237 رنز سکور کرکے ہدف کا کامیاب تعاقب کیا تھا، 2011ء میں گرین شرٹس نے 3 وکٹوں پر 223 رنز بناکر ہدف کا کامیاب تعاقب کیا تھا۔

واضح رہے کہ پاکستان نے ٹاس جیت کر پہلے فیلڈنگ کا فیصلہ کیا۔ ویسٹ انڈیز نے 280 رنز بناتے ہوئے پاکستان کو جیت کے لیے 281 رنز کا ہدف دیا۔

(جاری ہے)

ویسٹ انڈیز کی ٹیم 49 اوورز میں 280 رنز بنا کر آؤٹ ہوئی۔ ایون لوئس 60 رنز کے ساتھ نمایاں بیٹر رہے، جب کہ کپتان شے ہوپ نے 55 اور روسٹن چیز نے 53 رنز کی اننگز کھیلی۔

ویسٹ انڈیز ٹیم کے رتھرفورڈ 10، گڈاکیش موتی 31 رنز بناکر آؤٹ ہوئے جبکہ شیمار جوزف 8 اور شیفرڈ 4 رنز بناسکے اور یوں ویسٹ انڈیز کی پوری ٹیم 49 اوورز میں 280 رنز بناکر آؤٹ ہوگئی۔

پاکستان کی جانب سے شاہین شاہ آفریدی نے شاندار بولنگ کرتے ہوئے 4 وکٹیں حاصل کیں، نسیم شاہ نے 3 اور صائم ایوب، سفیان مقیم اور سلمان آغا نے ایک ایک وکٹ لی۔

ہدف کے تعاقب میں پاکستان نے اعتماد سے بیٹنگ کرتے ہوئے 281 رنز کا ہدف 49ویں اوور میں 5 وکٹوں کے نقصان پر حاصل کرلیا۔ ڈیبیو کرنے والے حسن نواز نے شاندار پرفارمنس دکھاتے ہوئے 63 رنز بنائے، جب کہ حسین طلعت 41 رنز کے ساتھ ناٹ آؤٹ رہے۔

پاکستان اب تین میچز کی سیریز میں ایک صفر سے آگے ہے، دوسرا ون ڈے جیت کر گرین شرٹس کو سیریز اپنے نام کرنے کا موقع ملے گا۔