ایچ بی ایلHBLمائیکروفنانس بینک اور سپارکو کے درمیان پاکستان کی پہلی سیٹلائٹ ٹیکنالوجی پر مبنی زرعی فنانسنگ کیلئے شراکت داری

اسلام آباد (اُردو پوائنٹ اخبارتازہ ترین - اے پی پی۔ 10 اگست2025ء) ایچ بی ایل HBLمائیکروفنانس بینک اور پاکستان اسپیس اینڈ اپر ایٹماسفیئر ریسرچ کمیشن ( سپارکو) نے قرضہ جات کی فراہمی کے نظام میں سیٹلائٹ پرمبنی زرعی تجزیات متعارف کروانے کیلئے مفاہمت کی یادداشت پر دستخط کر دیئے۔ کسی بھی بینک اور سپارکو کے درمیان اس طرح کے جدید حل کیلئے یہ اپنی نوعیت کی پہلی شراکت داری ہے جوکلائمیٹ اسمارٹ زرعی فنانسنگ کیلئے سپیس ٹیکنالوجی سے استفادہ کرنے میں ایک نمایاں سنگ میل ہے۔

اس اقدام کے تحت دونوں ادارے ضلع اوکاڑہ میں ایک پائلٹ پراجیکٹ شروع کریں گے جو پنجاب کا اہم زرعی زون ہے۔ پائلٹ پراجیکٹ میں سیٹلائٹ سے حاصل کی جانے والی ہائی ریزولیشن تصاویر،فصل کی صحت و پیداوار سے متعلق تجزیات، پیداوار کا اندازہ، رسک پروفائلنگ کا استعمال کرتے ہوئے قرض کی فراہمی سے قبل قرض کی اہلیت کی جانچ کی جائے گی۔

(جاری ہے)

محفوظ اے پی آئی اور ڈیش بورڈ انٹرفیس سے HBL MfB قرض دینے کے فیصلہ کے طریقہ کار میں میں اس اعدادوشمار کو شامل کرے گا جس سے کھیتوں میں جاکر دستی تصدیق کرنے کی ضرورت ختم ہوجائے گی۔

اس موقع پر اپنے خیالات کا اظہار کرتے ہوئے HBL MfB کے صدر اور سی ای او عامر خان نے کہا کہ ہمیں اس بات کی انتہائی خوشی ہے کہ ہم پاکستان کے پہلے مائیکروفنانس بینک ہیں جو جدید ڈیٹا پر مشتمل زرعی فنانسنگ کیلئے سپارکوکے ساتھ اشتراک کرر ہے ہیں جس کے تحت زرعی قرضوں میں سیٹلائٹ پر مبنی تجزیات کو شامل کیا جائے گا، پاکستان کے بڑے مائیکروفنانس بینک کی حیثیت سے HBL MfB اس قسم کی جدیدٹیکنالوجی کو آگے بڑھانے کے لیے مکمل طورپر تیار ہے جو اپنے صارفین اور مائیکروفنانس شعبے دونوں کے لیے سود مند ہو، یہ شراکت داری ہمارے اس وژن سے ہم آہنگ ہے جس کے تحت ہم اپنے صارفین کی زندگی کے معیار کو جدید مالیاتی حل کے ذریعے بہتر بنانا چاہتے ہیں، ہم سپارکو کے شکر گزار ہیں کہ انہوں نے ہمارے ساتھ شراکت داری کی، ہم مل کر پاکستان میں زرعی قرضوں کے لیے زیادہ سمارٹ ڈیٹا پر مبنی مستقبل کی طرف بڑھ رہے ہیں۔

اس موقع پر سپارکو کے ممبر ( ایس اے آر) ظفر اقبال نے کہا کہ سپارکو کو قومی ترقی کیلئے سیٹلائٹ ٹیکنالوجی کے استعمال میں قائدانہ کردارادا کرنے پر فخر ہے، HBL مائیکروفنانس بینک کے ساتھ اشتراک ہمارے لئے فخریہ لمحہ ہے کیونکہ ہم پہلی بار مالیاتی شعبہ میں اپنے ایگری کلچر جیوگرافک انفارمیشن سسٹم کو شامل کرنے جارہے ہیں، ہمیں اعتماد ہے کہ ہمارے تجزیات اور بصیرت سے نہ صرف قرض دینے کے طریقوں کو تقویت ملے گی بلکہ زرعی شعبہ کی ترقی اور دیہی علاقوں کی فلاح وبہبود میں نمایاں کردار ادا ہوگا۔

دونوں اداروں کے درمیان شراکت داری کے اگلے مرحلے میں قرض کی فراہمی کے بعد سیٹلائٹ سے کھیتوں کی نگرانی شامل ہوگی جس سے بینک فصل کے حوالے سے سرگرمیوں کو ٹریک کرسکے گا اور کسی بھی بے ضابطگی کی صورت میں پیشگی الرٹس جاری کرسکے گا جس سے رسک مینجمنٹ اور قرضوں کی فراہمی میں شفافیت کا ایک نیا دور شروع ہوگا۔ یہ شراکت داری پاکستان میں مائیکروفنانس اداروں کے زرعی قرض دینے کے طریقہ کار کو نئی سمت دینے کے لیے تیار ہے جو HBL MfB کو اسپیس ٹیکنالوجی کے بھرپور استفادہ سے زرعی قرضہ جات کے شعبے میں لیڈر بنائے گی ۔