سہولت بازار اتھارٹی نے گو بازاروں میں15 سہولتوں کا آغاز کر دیا

اشیائے ضروریہ کی کنٹرول قیمتوں پر فراہمی کیلئے حکومتی اقدامات جاری ہیں‘ڈاکٹر احسان بھٹہ

اتوار 10 اگست 2025 15:40

لاہور(اُردو پوائنٹ اخبارتازہ ترین - این این آئی۔ 10 اگست2025ء)سیکرٹری پرائس کنٹرول اینڈ کموڈٹیز مینجمنٹ ڈیپارٹمنٹ پنجاب ڈاکٹر احسان بھٹہ نے کہا ہے کہ لاہور میں سہولت بازار اتھارٹی کی جانب سے گو بازاروں پر 15 سہولتوں کا آغاز کر دیا ہے۔ فیصل ٹائون، مون مارکیٹ، گلشن راوی 1 اور 2، مدار ملت، رائے ونڈ، مانگا، شاہدرہ اور شادمان سمیت 7 مقامات پر ترقیاتی کام پہلے ہی شروع کیے جا چکے ہیں جنہیں سہولت بازار اتھارٹی کے حوالے کر دیا گیا ہے۔

ڈاکٹر احسان بھٹہ نے اس کی پیشرفت کا جائزہ لینے کے لیے مختلف سائٹس کا دورہ کیا۔قائمقام ڈی جی سہولت بازار اتھارٹی نوید احمد، جنرل منیجر روشن ضمیر، ڈپٹی ڈائریکٹر پراجیکٹس اور کنسلٹنٹ ملک مقصود احمد نے بریفنگ دی۔ انہوں نے گلشن راوی، شادمان، مدرے ملت روڈ ٹان شپ، فیصل ٹان کوٹھا پنڈ، مانگا منڈی ملتان روڈ اور رائیونڈ کے قریب سبزی منڈی کے مقامات کا دورہ کیا۔

(جاری ہے)

انہوں نے پائپ، فائونڈیشن، برک بیلسٹ، کنکریٹ وغیرہ کے معیار کو یقینی بنانے کی ہدایت کی۔ انہوں نے یو ای ٹی کی قائم کردہ لیبز سے ٹیسٹنگ میٹریل جیسے کنکریٹ سلنڈر وغیرہ کے ذریعے معیار کی جانچ کرنے کا بھی کہا۔ انہوں نے بجلی کے کھمبوں کے ارد گرد بانس بار لگانے کی بھی خواہش کی۔ انہوں نے شادمان کے مقام پر ایسے پودے لگانے کی بھی ہدایات دی جو نہ صرف مہکنے والے ہوں بلکہ ہریالی میں بھی اضافہ کریں۔ انہوں نے بتایا کہ بقیہ مقامات پر ترقیاتی کاموں کا معائنہ کرنے کے لیے بہت جلد اگلا دورہ کیا جائے گا تاکہ ترقیاتی کاموں کا جائزہ لیا جائے۔