پاکستانی کھلاڑی امیر خان کا کارنامہ، ملائیشیا میں انٹرنیشنل تائیکوانڈو چیمپئن شپ میں دو گولڈ میڈلز حاصل کرلئے

اتوار 10 اگست 2025 16:00

سوات(اُردو پوائنٹ اخبارتازہ ترین - این این آئی۔ 10 اگست2025ء)سوات سے تعلق رکھنے والیتائیکوانڈو کے مایہ ناز کھلاڑی امیر خان نے ملائیشیا میں منعقدہ انٹرنیشنل تائیکوانڈو چیمپئن شپ میں شاندار کامیابی حاصل کرتے ہوئے دو گولڈ میڈلز جیت لیے۔ اس عالمی مقابلے میں دنیا کے 34ممالک سے تعلق رکھنے والے تقریباً 6ہزار ایتھلیٹس نے شرکت کی، جن میں جاپان، کوریا، ملائیشیا اور فلپائن جیسے تائیکوانڈو کے بڑے نام شامل تھے۔

(جاری ہے)

انتہائی سخت مقابلوں کے باوجود امیر خان نے محنت، عزم اور مہارت کے بل بوتے پر اپنے حریفوں کو شکست دے کر پاکستان کا نام دنیا بھر میں روشن کیا۔ انہوںنے کہاکہ سفر کے دوران مشکلات اور وسائل کی کمی کے باوجود دوستوں اور رشتہ داروں کی حوصلہ افزائی نے ان کی ہمت بڑھائی، اور یہ کامیابی صرف ان کی نہیں بلکہ پوری قوم کی جیت ہے۔امیر خان نے کہا کہ اگر قوم متحد ہو تو دنیا کی کوئی طاقت پاکستانی نوجوانوں کے راستے میں رکاوٹ نہیں ڈال سکتی۔